Bangladesh-a raltlan Rohingya-te an haw kir lehna tur chungchangah Myanmar Military council-ten Zirtawpni khan MaungTaw khaw hmar lama an chenna tura an ruahman te an en fiah a. Rohingya raltlanten haw kir leh an beisei tiin AFP news-ah an tar lang a.
Bangladesh-a thuneitu thahnem takte, Rohingya raltlan mi 20 vel ten zuiin raltlante chenna tura an ruahmanna hmun 2-ah an en fiah a. Chenna tur hmunhma te hmu mah se, ram mi nihna (ID) an la pek theih loh avangin kir leh an tum rih loh thu a huhova kal zinga Rohingya raltlan pakhat chuan AFP Media a hrilh a. Raltlan hmeichhe pakhat pawhin camp awmna hmunah min awmtir mah se, Clinic leh Bazar chhehvel a ralmuang lo tiin a sawi bawk a.
Rohingya raltlante chuan awmna tur changtlung leh tun hmaa an lo awm tawhna hmun bakah ralmuang tak leh hriatpuina nei thlapa awm turin an ngen a. Myanmar thuneituten camp an tlawh tuma tel ve, Bangladesh raltlan commissioner Mizanur Rahman chuan eng ang pawhin sawi mah ula, in ruahmanna angin Bangladesh atangin thawn kir kan duh ber a. International human right pawl HRW pawhin Rohingya raltlante tun hmaa an awm tawhna Myanmar-a thawn kir leh turin Bangladesh sorkarte a lo ngen tawh bawk a ni.
Kum 2007 khan Rakhine (Ra Khaing, Arakan) hmar lamah ARSA pawl leh Myanmar Military council sipaite an inkap nasa hle a. Hemi hnu hian Military council-ten khawchhung then fai hna an thawhnaah Rohingya mi nuai 7 chuang an ram thenawm Bangladesh-ah an tlanchhia nual tiin UN chuang a tar lang a. Tun dinhmunah hian Bangladesh ram hian Rohingya raltlan mi maktaduai khat vel an enkawl mek nia hriat a ni bawk.
