Military council sipaiin Mandalay region, Mingyan township, Sone-Ywa-Kan khaw mi an man mi 5 zinga Ko Moe Zaw chu an dawpna lama, an nghaisakna hliam tuar lovin, July ni 31 khan Mingyan damdawi ina a thih thu a chhungten an sawi.
Kum 35 mi Ko Moe Zaw-a hnung zang chu chema zai khemna leh meizial hmawr linga dehna hliam te a awm bakah, a awm thinhnun leh dul vela silai fawnga chhutna hnuhmate chu hmuh a nih thu damdawi in lama enkawltu pakhat chuan a sawi a. “A taksaa an sawisakna hnuhmaah ha hawlhna (toothpick) tiat hmun him dam hmuh tur a awm lo a ni” tiin a sawi hial a ni.
Ko Moe-Zaw leh an khaw chhunga mi 4 chu military council sipaiten July ni 6 khan an man a. Ko Moe Zaw-a thih nachhan ber chu Chuap leh Kal chhiat vang niin damdawi in lam chuan an sawi a. Damdawi ina amah enkawltu pakhat chuan, “A chuap chu a pawp sung mai a, a Kal pahnih pawh a tla thla a, tui ril anga a awm tawh avangin engtin mah enkawl theih a ni tawh lo. A ek pawhin thisen hlir a chhuak a, a tuar thei tawh lo a ni, doctor pawn chutiang chuan a sawi,” tiin a chhungte a hrilhfiah a.
Mahse, doctor-in thih chhan a ziahnaah erawh chuan engtin chiah nge a ziah lan dan chu hriat a ni lo.
Ko Moe Zaw-an a thi hmaa a sawi dan chuan, ‘Mandalay kulh chhung indawpna hmuna ka awm lai chuan, chhun lamah tual zawlah kut hnung khirha thingthiin, min awmtir a, raw pum khat keh sawm vek khawpin min vaw thin a. Zan lamah lah room thimah min khung a, rubber tiang leh silai fawng ang tak thil sa khat deuhin min vaw thin bawk a. Zan dar 8 a rik hi ka hlau thei hle a. An zu in an ruih poh leh min vaw na tin a ni mai a. Min vuak tak tak chuan ka thi thang thei a, ka harh chhuah leh pawhin min vuak leh hlauin harh chhuah loh mai te kha ka duh zawk thin a ni,’ tiin a sawi..
Ko Moe Zaw-a ruang chu August ni 1 khan Sone-Ywa-Kan thlanmualah phum a ni a, a nupui leh kum 16 mi a fanu leh a fapa kum 7 mi leh kum 2 mite a kalsan tih hriat a ni.
May ni 21-a Sone-Ywa-Kan administrator U Than Naing (or) Sin-Pauh tia hriat leh July ni 4-a Shwe-Paw-Chun khuaa Dalan, sipaite report pe thintu lar tak Daw Mya Mya Soe te thah an nih hnuah Ko Moe Zaw chu man a ni a. Mahse, sipai lamin tualthattua an puh angin Ko Moe Zaw-a thah an ni lova, ani chuan U Sein Pauh-a vuinaah pawh kalin a va tawiawm hial zawk a ni, tiin an chhung khat hnai vai pakhat chuan a sawi a.
Ko Moe Zaw ruala man tawk a tupa kum 20 Ko La-Pyih (or) Chit Oo Maung tia hriat bawk, Ko Min Tu, kum 24 mi Ko Pheu Maung Maung leh kum 38 mi Ko Han Myint Thun (or) Han Gyi tia kohte chu thla khat dawn sipai lamin an man tawh a, tun thlengin khawiah nge an dah tih hriat theih a la ni lo.
Khaw chhung mipui venghimtu pawl ဇီးရိုး gorilla pawla an hruaitu pakhat chuan administrator leh Dalan thahnaah Ko Moe Zaw te chu engmah inhnamhnawihna a nei lo tih Myanmar Now a hrilh a. Mahse, thah an nih dan kimchang chu tualchhung mite zinga inhmelmakna rei tak awmtir thei a nih dawn avangin sawi chhuah a duh loh thu a sawi lang bawk a.
February ni 1 atanga sipaiin thuneihna an lak hnuah Mingyan township chhungah sipai dodalna chu kawng hrang hranga kalpui zel a ni a, leh lamah military council sipaiten dimdawina nei miah lovin, May thla atang mipui lamah silai hmet puakin pawisawi lo nunna tam tak an lak bakah kum tling lo naupangte pawh manin an lo sawisa tawh bawk a ni.
