Chin State chhim lam, Paletwa khawchhung PaLauhTaung khuaah April 29 atang khan Military council sipaiten zan curfew an puan thu hriat a ni a.
He khuaah hian eng vanga zan curfew puang nge an nih tih hriat chian a ni lova, AA (Arakan Army) te an lut chhuak nia an rin avanga zan curfew puang nia an rin thu Paletwa khuaa tualchhung mi pakhat chuan a sawi a.
“Paletwa khawchhung zawng zawngah zan curfew puan a ni hran lova, PaLauhTaung khuaah hian Rakhine (Arakan) mi leh sa te lut chhuak an tam vang nia hriat a ni a. Chhunah chuan veivah an phal a, eng vanga zan curfew puang nge an nih tih erawh kan hre lo” tiin a sawi a.
PaLauhTaung khuaah hian zan dar 7:00 atangin zing lam dar 5:00 thleng zan chhuah an khap a. Paletwa khuaah hian Ward 3 a awm a, PaLauhTaung Ward hi In tlemte khawsak khua an nih thu hriat a ni bawk.
PaLauhTaung khua hi KaLaTan tuipui kama awm a ni a, a khawcheng te hian Sangha mana ei zawng chhungkhua te an ni tlangpui a. Tun anga zan curfew an puan avangin ei zawnna kawngah harsatna an tawh nual thu hriat a ni bawk.
