NUG sorkar chuan D Day a puan atanga thla rei lo te chhungin Military council te hi an nuai bo vek dawn niin Revolution-a tel PDF te chuan an sawi.
Tun dinhmunah chuan mipui te hian an awmna atangin ralthuam an theih ang ang kengin an hmachhawn zel a, NUG pawhin a theih ang angin an pui zel a, sipai te do turin an inring reng a. Ram chhungah NUG ten sipai te hmachhawn hun tur hi thuchhuah siam rih lo mah se, thla rei lo teah do let turin hma an la thuai dawn tih thu hriat a ni.
Hmanni lawk khan Sagaing Region, KaNi township-ah khan tualchhung PDF ten bomb an kam avangin sipai lam mi 10 an thi a. Chuti rualin tualchhung mi 40 vel sipai ten an sawisak hlum thu tualchhung PDF hruaitu mi pakhat chuan RFA a hrilh bawk a.
“NUG-in min support chuan sipai hmaah kan tlawm dawn lo; mahse, sipai lam mi 10 an thih hian keini lam mi 20 kan thi chho thei a. Ralthuam neih leh neih loh ai mahin rilruin kan bei dawn a ni,” tiin a PDF hruaitu pakhat chuan a sawi.
“Kaya State-ah chuan KNDF Karenni hnuaiah Revolution-a telte insuihkhawmin NUG-in an puan tur D Day an tih, ram chhunga beihpui thlak hun tur hi kan nghak mek a ni. Kaya State-ah hian PDF te an thahnem ve hle a, KNDF te nen pawh kan inzawm tha hle a, KNPP te nen chuan kan inlungrual hle a ni, ” tiin Revolution hruaitu pakhat chuan a sawi bawk a.
Kaya state-a PDF lam hruaitu pakhat chuan, “KPDF te pawn EAO (Ethnic Armed Organization) te nen inrawn zelin KNDF hnuaiah Battalion 19 awm thin pawh chu Battalion 20 emaw 21 emaw awm belh rin a ni a, NUG-in hma an lak phawt chuan keini chu Ready a ni ringawt mai. Engkim chu kan pui thei lo a ni mai thei; mahse, ralthuamah chuan kan phang bik lo.
Kan hma lawk September thlaah kian Sr.General Min Aung Hlaing hian an hmachhawn dawn a. ‘Convention Warfare’ nen chuan kan hneh lovang; mahse, ‘Guerilla Warfare’ chuan kan hneh ang. Tunah chuan ‘Guerilla Warfare’ hun lai tak a ni a, tun hma chuan thalai ten ralthuam an keng lova, tunah chuan kawngzawh pawh manin speak out a ni a.
Rawlrala che ten speak out-a location an hriat theihna pakhat chu Mandalay PDF-ah khan a hriat a. Khami tum khan hneh tur kan ni a, kan hneh lo a nih kha. Dik tak chuan rawlral, a ruka bei tur zawk kan ni. Ka ngaih dan chuan September thlaah hian a vawr tawp a thleng thei a, thuneihna an nei thei tawh dawn lo,” tiin NUG-in D Day puangin thla rei lo teah an sipai sorkar an nuai bo thei dawna a rin thu a sawi a.
Tunah chuan NUG te an inla strong hle tawh a, State leh Region ngaichangin hma an la zel dawn a. U Man Ngaing Maung chuan, ‘NUG leh PDF te hi an zuih ral dawn lo, D Day puangin thla 2 chhung lekin Military council-in an din thar Caretaker Government chu nuai bo a ni ang’ tiin a sawi bawk a.
Chutih rualin Sr.General Min Aung Hlaing-a pawl chuan August ni 1 atangin tharum leh firfiak zawnga sorkar do lette leh chungte tanpuia, thawhpuitute zawng zawng chu action lak a nih dawn thu an lo puang chhuak ve bawk a ni.
