Chin Hill leh Sagaing ramri Khaikam (Ku Myiang, mel 9) khua Kalay University chhehvela inthliar chhuahte haw kir vek turin CDM-Siyin-ten May 11 khan thuchhuah an siam leh thu hriat a ni a.
Military council sipaite buk khuarna Chin State Khaikam khua police Station leh Kalay University awmna gate-pui chhehvel mel 1 chhehvela awm, tualchhung mipuite May 9 khan CDM-Siyin-ten inthliar chhuak vek tura thupek an chhuah hnuah May 10 khan Khaikam khua leh Kalaymyo leh Chin State ramri bakah HlaingThaYar khuaa tualchhung mipui 1000 chuang a tlanchhuah thu hriat a ni a.
A chhehvel tualchhung mipuite an tlanchhuah hnu May 11 zing lam 6:00 vel khan Khaikam khua Ku Myiang check gate-a Military council sipaite CDM-Siyin Battalion-ten vawi 10 chuang an bomb thu hriat a ni a.
Mipuite inthliar chhuak tura kan tihna chhan chu Military council sipaiten mipuite an vau vang leh ralthuam lian nena kah an tum avangin mipuite an him zawk nana ruahman a nih thu CDM-Siyin thupuangtu chuan a sawi a.
“Chawlhkar hnih khat liam taah khan tlang kara inbeihnaah Military council sipaite thi leh hliam an awm nual avangin an kir leh hnu-ah, Military council sipaiten nangni PDF thlawptute hi Ku Myiang check gate kan khar chuan thla khat pawh in daih lovang, Vaimin chhum ring ve mai mai tiin an tawng khum a. An tih ang chuan gate an khar a, thamnain lirthei an kaltir bawk a, zanah ke 12 nei Motor lian an kaltir hian Kyats nuai khat an dil thin a. Hetia an tih avangin an duty-na check gate beih kan tumna lamah mipuite him kan duh avangin kan inthliar chhuahtir a ni” tiin a sawi zui bawk a ni.
Mipuiten thuchhuah anga an zawmnaah he Revolution hi min thlawp a nih tih kan hre chiang a, a tawp thlenga thawkho turin an sawm thu CDM-Siyin-ten an sawi a ni.
Military council sipaiten May 11 khan ralthuam lian an kah chhuah avangin Khaikam khua No. 2 Ward-ah bomb a tla a, chhiatna a awm loh thu leh tun dinhmunah Kalaymyo leh a chhehvelah inkah theihna dinhmun a thlen theih reng thu hriat a ni bawk.
