Sagaing region, Khin U township-ah Military council sipaite bomb kam hmanga an beihnaah Military council sipai 12 an thih thu Khin U Special force Organization-KSO pawlte hnen atanga hriat a ni.
May 14 zing dar 6:30 vel khan Khin U township tlak lam InPatKuit Bazar tluana Military council sipai buk khuar te leh YwaThit Kone (Zua Tit Kong) khuaa Phyusahti pawlten ChanTaKong (Aung Chan Ta) khuaa ralthuam lian an kah chiam tawh hnuah khawchhung an luh chilh nghal a. Khawchhunga chenna in an rawk nasa hle a, zing dar 8:10 vela an camp an pan laiin PDF-ten bomb kam hmanga an beih thu hriat a ni bawk.
He an beihnaah hian Khin U Special force Organization-KSO pawl, Township NUG PDF pawl leh tualchhung pawl tangrualten point 14 hmun atangin bomb 14-in an bomb a, Military council sipai leh Phyusawhti 12 an thih bakah G-3 silaimu bawm 1 leh 7.62 silaimu tlawn 15 an laksak thu hriat a ni a.
Heng bakah hian Tanintari (Ta Nin Ta Ri) region, Dawei township, Pakari khuaa Military council sipai buk khuar te Sniper-a an kahnaah Military council sipai mi pakhat a thih thu PDF-T 1-te hnen atanga hriat a ni bawk.
May 10 zing dar 6:30 vel khan Dawei township Pakari khuaa Military council sipai buk khuarten passenger phur motor tlante an duh zat pawisa an dil thin avang leh kut hlei taka an chet thin avangin PDF-ten Sniper silaia an kap a, Military council sipai 1 a thih thu hriat a ni.
He inbeihnaah hian PDF Dawei District Battalion 1, company 2 operation, DGRF, Eden leh Aline Force tangrual pawlten an beih rawn thu hriat a ni a.
Military council sipaite hi PDF Dawei District, Battalion 1 leh tangrual pawlten a tawp thlenga an beih zel dawn thu an thuchhuahah an tar lang bawk a ni.
