MOCHA cyclone thlipui avangin Chin State huam chhunga CNF camp hmunpui telin chhenna in a chhiat nual thu hriat a ni a, May 14 khan Rakhine tlangdung atangin Sittwe (Sit Tue) khawpui a pal tlang thu hriat a ni a.
May 14 zan atang khan Chin State-ah darkar khatah mel 50-70 laia chakin Mindat, Paletwa, Matupi, Halkha, Tedim, Tawnzang leh Falam township-ah te a pal tlang a.
He thlipui avang hian Chin State Matupi Township-a CDF-Matupi camp hmunpui a chhiat nual thu CDF-Matupi-ten an thuchhuahah an tar lan bakah Matupi township chhungah chenna in tam tak a chhe nual a, inbiak pawhna a harsat avangin a chhiat dan leh chhiat zat hriat chian a la ni rih lova.
Kanpalet township Ma Chia Eing Nu khuaah chenna in pakhat, Biak in pakhat leh school rangva a hawk a, Paletwa township SaMi khuaah pawh chenna in a hawk nual thu hriat a ni a. Halkha khawpuiah pawh In 2 a tluk chhiat thu Salai Isacc Khin chuan a social Media-ah a tar lang a ni.
Hetiang vek hian Paletwa township CDF-Paletwa Battalion 2 hmunpuia Solar plat te, Falam township CNDF Battalion 2, hmunpui rangva leh Solar plat te a chhe nual bawk a.
MOCHA cyclone thlipui a chak tawh loh hnuah Rakhine State bakah Chin State, Magwe region, Mandalay region. Sagaing region leh Kachin State a pal tlang a, May 15 tuk khan Myanmar hmar lamah a pan laiin thlipui chakna a awm tawh loh thu NUG sorkar mipui tanpuitu pawlten an thuchhuahah an tar lang a ni.
Hetia khawmuala thlipui leh ruah a sur nasat avangin tui a lian a, chhiatna a thlen nual thu hriat a ni bawk.
Tun dinhmunah hian chhiatna an tawh dan te chhui mek a ni a, MOCHA cyclone thlipui avang hian Sagaing region chuanchung leh Kachin State hmun hrang hrangah ruah nasa tak a la sur thei a ni.
He thlipui avang hian Matupi khawchhungah chenna in 300 chuang an nuai chhia a. hriat theih chinah thlipui avangin mi 18 an boral tawh thu NUG sorkarten an thuchhuahah an tar lang a ni.
