MOCHA cyclone thlipui avangin Chin State-ah chenna in a chhiat nual thu hriat a ni a.
May 13,14-a MOCHA cyclone thlipui tleh nasat avang khan Chin State, Matupi township-ah chhiatna an thleng nasa hle a, Chin State pum puiah chenna in 500 chuang a chhiat thu Chin Health Organization-ten an thuchhuahah an tar lang a.
An tar lan dan chuan Matupi township HongLin khuaah in 60, ThongLin khuaah in 20, Zuavar khuaah in 23, Kihlueng khuaah in 29 leh Chkek in, Fanai khuaah in 200, Tengsi khuaah in 115, Lailenpi khawpuiah in 100 leh Thawnglan khuaah in 52 vel a chhiat thu hriat a ni a.
CDF-Matupi information-a thuneitu pakhat chuan “An awmna hmun vel chu a chhe vek a, awmna tlak pawh a ni tawh lo, ruah a sur palh takin tiin Silpaulin-in an inkulh hlawm a, hetiang anga chawlhkar hnih khat vel an awm reng chuan an harsa ngawt ang” tiin a sawi a.
MOCHA cyclone thlipui hian Rakhine State Sittwe (Sit Tue) khawpui kiang atangin darkar khatah mel 130 vela chaka nain Chin State, Matupi khaw kiang leh Sagaing region chuanchung lamah a tleh thu khawchin thlirtuten an sawi a ni.
He thlipui avang hian Kanpalet township taltlan camp-a in 20, Paletwa-Sami khuaa in 100 chuang leh Mindat township-a in 20, Tedim leh Tawnzang khawpuiah in tam tak a nuai chhiat nual thu hriat a ni a.
Heng bakah hian Falam township Zaniat ram tlangdungah Biak in leh in 34, Simcing khuaah RC Biak in leh in 11, Tlangphai khuaah school leh in 3, Heiangrun khuaah in 14, Lungler khuaah in 6 a chhiat thu hriat a ni bawk.
Chin State Halkha township Sakta khuaah in 30, Halkha Vengtharah in 11, thlipuiin a nuai chhiat bakah hliam an awm nual thu hriat a ni a, CHRO-ten an chhui dan chuan Chin State-ah chenna in 700 chuang thlipuiin a nual chhiat thu hriat a ni a.
Chin State-ah Military council sipaiten internet leh phone an khar rih avangin thlipuiin a nuai chhiat chungchangah chanchin eng mah a hriat theih lova, tun thleng pawh hian tanpuina chungchangah harsatna an la neih thu hriat a ni bawk.
