Sagaing region, KyunHla township-ah Military council sipaiten May 24-26 chhunga operation an neihnaah tualchhung mi 70 vel an man thu tualchhung miten RFA Media an hrilh a.
Kyunhla khua tlak lam zar, TaPhanSeih khaw bulah Military council sipaiten operation neiin tualchhung mi an man nual thu hriat a ni a, an man zat hriat chian a nih loh thu security zinga hming thup pakhat chuan heti hian a sawi.
“Kan awmna hmunah min rawn bei a, khawchhung tlak lam atangin Thlama bungruate an lak mai bakah Thlama birute an man nual bawk a, ramhnuaia hnathawkte an tlanchhe nual” tiin a sawi a.
Military council sipai thlawptuten Telegram-a an tar lan dan chuan May 24 zing dar 8-ah Kyunhla township TaPhanSeih khaw bula PDF te leh KIA-te supply-tu SwePhaung hmun 300 chuang an luh chilh tiin an tar lang thung a ni.
Heng bakah he khua vekah hian PDF sipai mi 15 an that a, a tanpuitu mi 70 chuang an man tiin an tar lang bawk a ni.
He buaina chungchangah hian Sagaing region Military council thupuangtu RFA Media-te an zawhnaah chhanna a la awm rih lo a ni.
Tun dinhmunah hian Kyunhla township-a khaw 4-ah tualchhung mipui 5000 chuang an tlanchhiat thu tlanchhe zinga tualchhung mi pakhat chuan RFA Media a hrilh a. He thil thleng chungchangah hian RFA Media-ten an chhui mek thu hriat a ni bawk.
Military council sipaite hi Phyusawhti sipaite tiamin mi 300 rual vel an awm a, May 21 atang khan operation pawl 3-in an luh chilh thu tualchhung miten an sawi a ni.
