Myanmar Military council sipaiten human right an pal zuh avang leh mihring chet dan phunga an chet loh avangin Military council sipai officer-te New Zealand ramah luh an phal loh thu New Zealand base Newsroom news chuan a tar lang a.
Kumin 2023 kum chanve velah hian ASEAN thalai rualte leh sumdawng pawlten New Zealand ram tlawh turin an ruahman a, he tour-ah hian Myanmar mite tel ve lo turin an dah that thu New Zealand foreign Minister Nanaia Mahuta chuan a sawi a.
New Zealand ram hian Myanmar nena inkungkaihna turah a intliar fihlim a, ram chhunga an chet rawvana chungchangah an dem nasa hle a ni.
Military council sipaiten kum 2 chhung thuneihna an lak hnu hian New Zealand ramin Dollar maktaduai 31 a tanpui tawh a, he a tanpuina hi Military council sipaite tana tanpui a nih loh thu New Zealand foreign Minister leh Ministry of Commerce-ten an thuchhuahah an tar lang bawk a ni.
May 24 khan Military council-te chunga sumdawnna an dan chahna leh hremna chi hrang hrang te sawiho a nih thu US foreign Ministry-ten an thuchhuahah an tar lang a. Henga sawi ho te hi US, Canada, Great Britain, Eroup commision leh EU te an nih thu hriat a ni bawk.
US hruaitute chuan henga inhnamhnawih mi 80 leh hnathawhna hmun 30 chuang an hremsak a, hetiang vek hian Great Britain, EU te pawhin an hrem thu hriat a ni bawk.
