Kum 2023, May thla chhung khan Myanmar ram chhung huapah Military council sipaite chetna avangin hmeichhia 29 an boral tawh a, heng chheichhe zinga mi 14 te chu an hal hlum thu Myanmar hmeichhia insuihkhawm pawl (BWU)-ten June 2 khan an thuchhuahah an tar lang a.
Heng hmeichhia an thah tak te hi Pago, Sagaing, Mandalay, Kayah hmuna mite an ni tlangpui a, Pago region-ah an tam ber thu hriat a ni.
Military council sipaiten an thah tak hmeichhe 14 te hi Pago, Sagaing leh Mandalay region-a mi te niin an chenna inah luh chilhin an man hnuah an hal hlum thu Myanmar hmeichhe insuihkhawm pawl Join secretary 1, Ma Zu Pa DuMa chuan RFA Media a hrilh a.
“Tun hnai atang khan Military council sipaite hian mipa leh hmeichhia thliar lovin an man hnuah an chenna inah luh chilhin an hal hlum thin a. Tun hnuah hian Military council sipaiten hmeichhiate tin zawnin an that thin a, an thah danah pawh a rapthlak thin hle a ni”
Hetia Military council sipaiten mihring dikna chanvo dik lo taka an sawisak avang hian kan thei tawpin hma ka la zel dawn a ni tiin a sawi a.
May thla chhunga hmeichhia 29 boral te zinga mi 8 te chu Thlawhnaa an bomb vanga boral te an ni a, hmeichhia dang 6 te erawh chu kah hlum an nih bakah hmeichhe pakhat pawh ralthuam lianin a fuh vanga boral a nih thu hriat a ni bawk.
Military council sipaiten thuneihna an lak kum 2 hnu hian hmeichhia 542 an boral tawh bakah mi 3517 an man tawh a, mi 859 Jail-ah an khung tawh thu BWU-ten an thuchhuahah an tar lang a ni.
