Myanmar Military council thunun hnuaia Ministry of Education chuan kum 2022-2023 zir kumah pawl 10 exam rerult chu June 9 tuk khan tar chhuah a ni a, Myanmar ram pumah Chin State hi pass tha ber 4-na a nih thu hriat a ni a.
Kum 2022-23 zir kum hian Chin State-ah pawl 10 exam-na hmun 13 a awm a, exam chhang zawng zawng 2924 zingah zirlai 2045 an pass a, ram puma pass dan chhutnaah 72.42 niin 4-na a kai phak thu hriat a ni.
Kum 2021-22 zir kum hian Chin State-ah pawl 10 zirlai mi 2259-in exam an chhang a, exam pass mi 605 an awm a, pass 26.78% niin ram pumah a hniam ber thu hriat a ni a.
Military council-ten thuneihna an lak hma atang pawh khan Chin State hi pawl 10 exam-naah ram pum huapin result chhe ber a nih loh pawhin a chhe ber dawttu a ni a. Military council-te hunah hetia pass an san tak avangin Chin mipuiten mak an tih thu an sawi a.
Hetia pass an san tak avangin zirna lamah kum rei tak thawktu pakhat chuan “Ka hmuh dan chuan zirlaite leh nu leh pate tan lakna vang a ni thei a, zirlai hlui an hman vangte pawh a ni thei bawk. Zir thiam avanga pass an awm thei a; hetia 70% deuhthaw an pass-tirna chhan hi thil felhlel an awm mai thei bawk. A endiktute chungah an inngat thei bawk a, ram boruak chungchang avangin thil tam tak a awm thei bawk ang” tiin a ngaih dan a sawi a.
Kum 2023 March 8 khan zirlai hlui hnuhnung ber, pawl 10 exam an chhannaah Chin State, Thantlang township leh Kanpalet township bakah township hrang hranga exam chhanna hmun 13-ah zirlai mi 3461 atangin mi 2824-ten an chhang a.
Myanmar ram pumah zirlai hlui, kum 2023-a exam chhangtu zawng zawng mi 160000 an ni a, mi 109851 an pass a, pass zat 67.87% an nih thu hriat a ni bawk.
