All India Radio News Aizawlin a puan danin India, Mizoramah Myanmar leh Bangladesh atanga sa himna zawnga raltlan lutte tan United States atangin India pawisaa cheng nuai 400 chuang hu tanpuina an rawn thawn thu hriat a ni a.
Hemi buaipuitu MSU President Pu Samuel Zoramthanpuia leh hruaitu dangte chuan Mizoram lama rawn thawn chho turin Kolkata-a Netaji Subash Chandra Bose lawng chawlh hmun an thleng tawh a. US atanga an rawn thawn zingah hian chhangphut, buh atanga siam ei tur ‘Mana Pact’ an tih mai chu a tel a, hei bakah hian damdawi lam leh damdawi ina hman tur chi hmanruate a tel bawk thu hriat a ni a.
Project Mizoram tia an vuah buaipuitu zingah hian Myanmar Refugee Relief Committee, Bangladesh Refugee Committee, R2P Myanmar Way, Arizona Falam Baptist Church leh Chin Health Organization te an tel thu hriat a ni bawk.
Tun dinhmunah hian Mizoramah Myanmar atangin raltlan 34,278 an awm mek a. Champhai district-ah tam berin, mi 12,209 an awm a. Bangladesh Chittagong Hill Tracts atanga raltlante hi Lawngtlai district-ah mi 773 an awm mek thu hriat bawk a ni.
