Myanmar-ah Military council sipaiten thuneihna an lak hnu atangin rampum huapah chenna in 70000 chuang an hal chhia tawh zingah Chin State hi chhiat tam ber 3-na a nih thu Data for Myanmar hnen atanga hriat a ni.
Data for Myanmar-ten June 14-a an thuchhuahah chuan Military council sipaiten kum 2021 May 1 atangin 2023 May 31 thleng khan chenna in 70324 an hal chhiat thu an tar lang a.
Sagaing region hi rampum huapa in hal chhiatna tam ber niin In 53816 an hal chhia a, a dawtah Magway region niin In 10451 an hal chhiat thu Data for Myanmar chuan a tar lang bawk.
Chin State hi chhiat tamna 3-na niin In 1637 an hal chhia a, In 302 hi Thingtlang khuaa mi niin In 1335 te hi khawpui leh a chhehvela an hal te an nih thu Data for Myanmar hnen atanga hriat a ni.
Revolution pawlte chet thatna hmunah Military council sipaiten an bei nasa tiin CNO Deputy Director Salai Van Sui San chuan heti hian a sawi a.
“Revolution, PDF chet thatna hmunah an hal nasa a. Revolution te nena inkungkaih lo, mipui pawi sawi lo In an hal chiam ringawt a, eng vanga hal nge hriat thiam a har ngawt mai, mipui leh Recolution-te an chona ang a ni ” tiin a sawi a.
Chin State-ah hian Thantlang khuaah In 1299 halin an hal tamna ber a ni a, Halkha leh Falam township-ah In 200 chuang Military council sipaiten an hal thu Data for Myanmar chuan a tar lang a ni.
Hetia Military council sipaiten khawchhung mipui pawi sawi lo, chenna in tihchhiat leh an hal chhiat hi International human right dan pal zutna a ni tiin CNO Deputy Director chuan a sawi bawk a ni.
