Mizoram State, Lawngtlai district chhunga Myanmar atanga raltlan camp hmun 3-ah zirlai naupangten an zirlai hmarua chi hrang hrang an mamawh zual thu zirtirtu pakhat chuan a sawi a.
“Paletwa khua Titlanpi khua, Kawsaw leh Sontlanpi khua atanga raltlan camp-a zirlai naupangten zirlai bu, ziak lo puan leh a ziakna an mamawh hle” tiin zirtirtu Salai Zar Bawi chuan a sawi a.
Titlanpi khua leh Sontlanpi khuaah hian Primary school an hawng a, Kawsaw khuaa Middle school pawh mipui sum thawh khawma din tho a ni a. Heng school 3-ah hian zirlai naupang 100 vel an awm a, zirtirtu 3 zelten an zirtir thu hriat a ni a.
“Military council sipaiten min bei zel a, naupangte zirna chungchangah an hmakhua tur kan ngaihtuah avangin inrawn khawmin zirna school kan buatsaih tawp a. Kan nu leh pa, Halkha, Falam, Mindat, Palletwa, Matu, Mara, Asho miten min tanpui ngei kan beisei” tiin Salai Zar Bawi chuan a sawi a.
Heng raltlan camp, school 3-a naupang zirtirtute hlawh hi camp-a awm nu leh paten an remchan ang tawkin sum an thawh chhuah atanga pek te a nih thu hriat a ni bawk.
