MOCHA thlipui avangin Chin State chhim lam Paletwa khua leh Semi khuaah Buhfai lut a tlem sawt avangin buhfai man a san zual thu hriat a ni a.
May 14 atang khan Rakhein State atangin MOCHA thlipuiin a nuai tan a, in tam tak a chhe nual a, Paletwa leh Semi khuaah buhfai man a san hle thu Paletwa public administration pawl zinga mi pakhat chuan a sawi a.
“MOCHA thlipui avangin Rakhein atangin thliar luh a harsa a, Semi leh Paletwa khuaah buhfai, tel (Chhitui) leh chi mante tun hma aiin a to sawt hle a, tun hmaa buhfai pangngai Kyats 40000 man chu Kyats 80000-in kan lei thin a. A bik takin buhfai man an leta a man a san avangin harsatna kan tawk mek a ni” tiin a sawi a.
Paletwa leh Semi khuaa mipuite hian buhfai an lei khawlsa a, MOCHA thlipui tleh hma khan PawSanNgyu buhfai Kyats 60000 man a nih laiin tunah chuan Kyats nuai khatin an lei tawh thu hriat a ni.
Paletwa khuaa tualchhung mi pakhat chuan “MOCHA thlipui tleh hma kha chuan Kyats 70000,80000-in kan lei thin a, tunah erawh chuan Kyats 140000-in kan lei thin” tiin a sawi a ni.
Tunlai dinhmunah hian hnathawh tur a vang a, sum zawn a harsa bawk a, MOCHA thlipui a tleh hnuah hian mipuiten harsatna an tawk nasa hle a ni.
