Myanmar ram chhunga sum che velah US Dollar khat hi Myanmar Kyats 3030 nen a inhen thu June 22 khan hriat a ni a.
Ram pawna Thlawhnaa thlawk chhuak turte Air ticket an leinaah US Dollar khatah Myanmar Kyats 3030-a an chhutsak thu hnathawktuten an sawi a.
Hei hi Myanmar Foreign Trade Bank (MFTB) leh Myanmar Investment & Commercial Bank (MICB), US sorkarin a tih tawpsak avanga June 20 atangin US Dollar tangka thleng a san thu nia hriat a ni a.
Heng Bank lian 2 te hi US sorkarten June 21 atang khan an tih tawpsak thu official-in an thuchhuahah an tar lang a. Central Bank-in a ruahman dan chuan US Dollar khatah Kyats 2100 a nih laiin Kyats 1000-in a khum ta a ni.
Military council-te chuan hetia tih tawpsak a nih avangin a tam leh tlemah harsatna kan tawk thei ang a, kan ram hian kan pal tlang zel ang chu tiin Military council thupuangtu Major General Zaw Min Tun chuan a chhang a ni.
Heng Bank lian 2 an tih tawpsak bakah US nen indawrna chi hrang hrang kharsak an nih avang hian ram chhung mipuiten harsatna kan tawk zual mai thei tiin sumdawng lian te chuan an sawi a ni.
