Kachhin State, PhaKanh township-ah chhum lo chat lova ruah a sur avangin Uh Yu tuipuia tuilian avangin Lone Hkan khuaa chenna in 20 vel tuilianin a len thu tualchhung mite hnen atanga hriat a ni a.
June 22, tlai lam dar 5 vel atang khan chuanhnuai atangin tui a rawn chim sang chhova, chenna inah feet 7 vela sangin tuiin an rawn chim chhoh thu an sawi a.
Mihring thi leh hliam an awm lo nia hriat a nia, chenna in thenkhat a chhiat nual thu Lone Hken khuaa hming thup pakhat chuan RFA Media a hrilh a.
“Kawng vela Inte chu tuiin feet 3 velin a chim nual a, chuanhnuaia awm In thenkhat te chu feet 7,8 velin tuiin a chim pil a. A chhan chu ruah tui tam vang chu ni mah se, lunghlu khur laihovin leivung an paih fimkhur loh vanga ruam atanga ruahtuiin a chim te an ni tlangpui a, khawchhungah tuiin a hnawh avanga In a hnawl te an ni” tiin a sawi a.
Lone Hken khua chhehvelah hian leivung an paih khawm feet 90 chuanga sang a awm nual a, nakin lawkah tuiliana insiamin an awm theih thu an sawi bawk a ni.
June 22 tuk khan chenna in thenkhatah tui tla hniam mah se, kawnga veivah a harsat bakah hnathawh a la theih loh thu an sawi bawk a ni.
Uh Yu tuipui avang hian Pha Kanh khaw chhehvelah tui a lian ngai lova, kuminah hetia tuilian a awm thei hi mak an tih hle thu tualchhung miten an sawi a ni.
PhaKanh township-ah hian lunghlu khur laih avangin tuilian leh leivung chim avangin kum tin nunna chan an awm nual thin thu hriat a ni bawk.
