Sagaing region, Sagaing township, TaHlaing khua chu Military council sipaiten July 2 khan an luhchilh avangin PDF sipai 5 an thah bakah chenna in 100 chuang an hal chhiat thu tualchhung miten an sawi a.
Military council sipai 70 velten an luhchilh lai hian Buka awm mek PDF sipai 5 te chu an kap a, ralthuam neih that loh avangin ram tan an nunna an hlan thu tualchhung mi pakhat chuan a sawi bawk.
Military council sipaiten khawchhung chhehvelah ralthuam lianin an tawngpawng kah chiam thu a sawi zui bawk a ni.
Hemi hnu hian Military council sipaiten tun hmaa an lo awm reng tawhna Sagaing township, PaDu khuaah an kir leh thu an sawi a. May 19 khan PaDu khuaah Military council sipaiten buk an khuar avangin tualchhung mipui tlanchhiate a la haw ngam rih loh thu a sawi bawk a.
He thihna chungchangah hian Sagaing region, Military council thupuangtu U Saw Naing, RFA Media-ten phone hmanga an zawhnaah chhanna a awm rih lo a ni.
June 28 khan Sagaing township, SintGaing khua chu Military council sipaiten an luhchilh avangin PDF 14 an kap hlum tawh a.
June 25 pawh khan Military council sipai 50 rualten AyeYarWaDi (Airawdi) tuipui kam, KinTaw khua chhuah lama PDF buk an luhchilh avangin PDF sipai 17 leh tualchhung mi 3 an thah thu Sagaing township, PDF Asst, leader chuan RFA Media a hrilh a.
Chuvangin June 25 atangin July 4 thleng, ni 9 chhung khan Military council sipaiten Sagaing township huam chhungah PDF sipai 36 an thah tawh thu hriat a ni bawk a.
AAPP-ten an chhinchhiah dan chuan Military council-ten thuneihna an lak hnu, June 4 thleng khan Military council sipaiten mihring 3744 an thah tawh thu an tar lang a.
Data For Myanmar te chuan thuneihna an lak hnu, kumin 2023 June 14 thleng khan Sagaing region-ah chenna in 53816, Military council sipaiten an hal chhe tawh niin a tar lang thung bawk a.
UNOCHA te erawh chuan thuneihna an lak hnu, kumin 2023 June 13 thleng khan Sagaing region-ah mi 765200, in leh lo an tlansan tawh thu an tar lang bawk a ni.
