All India Radio News Aizawlin July 4-a, a tar lan danin Mizoram Presbyterian Church, Synod chuan Manipur tualchhung buaina avanga harsatna tawkte tan July 9, Pathianni zan inkhawmah Kohhran hrang hrangten tawngtai rualna nei tura ruahman a nih thu hriat a ni a.
Manipur-a Meitei leh Tlângmite inkara buaina chhuakah hian Biak In, Kohhran Office leh Quarters te leh mi mal in thahnem tak an hâlnaah pawi sawi lo nunau nunna laksak bakah râwng taka chêtna te chu Mizoram Presbyterian Kohhran chuan a dem tak zet tih an thuchhuahah chuan an tar lang a.
Manipur tualchhung buaina avanga Mizorama sa himna zawnga rawn lut zirlai an awm belh zel a, Mizorama District hrang hrangah zirlai 1500 chuang an awm tawh thu hriat a ni bawk.
Manipur atanga Mizorama sa himna zawnga rawn lut hi mi 12,000 vel an awm mek a. Sorkar mai bakah tlawmngai pawl hrang hrangten tanpuiin Central YMA-in transit camp a siamah mi 500 chuang an lut tawh a, heng mite hi a remchan dan angin Veng hrang hrangah sem darh leh thin an ni a. Hetih lai hian raltlan rawn lut hi an tlem hret hret a, mi eng emaw zat chu an in lamah an haw leh tawh bawk a ni.
Manipur atanga raltlan rawn lutte hi, a tlangpuiin Lamka khawpui leh a chhehvela mite an ni a, raltlante hi Central YMA chuan an remchan dan angin an hnathawh tur an zawnsak thin a, thenkhat chu mi awmpuiah tangin mi huan enkawltu leh ni tin inhlawhnate an zawnsak thu hriat a ni bawk.
