Magway region leh Chin State ramri Shaw township, YeKin khawpuma chenna in an hal dinhmun va entu tualchhung mi 20 vel te chu Military council sipaiten an man ringawt a, LoneShi khuaa Military council Camp-ah an hruai thu hriat a ni a.
“YeKin khuaa In an hal zingah tuna an man mi 20 vel te In a tel lo a, Military council sipaite Camp, LoneShi khuaah an hruai hlawm a, Military council sipaite an la duty ru mek” tiin CDF-Kanpalet, Khonu battalion-a thuneitu pakhat chuan a sawi a ni.
July 15, zing dar 4-8 vel thleng khan CDF tangrual pawlte leh Military council sipaite an inkap nasa hle a, July 14 pawh khan Kanpalet khawpuiah CinDwe (Chin Doi) khuaa ration phur Military council sipaite chu CDF tangrualten an beih rawn thu hriat a ni a.
Military council sipaite hian YeKin khua hi bomb alh thei nen a khawpumin an bomb a, chenna in 350 awmnaah In 300 chuang vel an hal thu hriat a ni bawk.
“July 14, zing 11 khan Military council sipaiten ralthuam lianin an bomb alh bakah kut ngeiin an hal bawk a, naupang pakhat a hliam a, thim thlengin an bei” tiin CDF-Kanpalet, Khonu battalion-a thuneitu pakhat chuan a sawi a ni.
He inbeihnaah hian Military council sipai motor pakhat hal chhiat a ni a. CinDwe khaw pan, Military council sipai 300, Tank 2, JCV car 1 leh sipai motor 20 vel a tel thu hriat a ni bawk.
KyaukThu northen battalion Military council sipai 200 rual pawl leh LoneSho khuaa Military council sipai 300 rual pawl te hi khawmual atang leh Thlawhna hmanga an chet mai theih avangin mipuite inveng fimkhur theuh turin an hriattir a ni.
