Sagaing region, Kalaymyo huam chhungah zan dar 8 atangin zing dar 4 thleng, lirthei hmanga mipuite chhuakvak lo turin CNO/CNDF-Upper Chindwin Region-ten July 15 khan hriattirna an chhuah thu hriat a ni a.
Kalaymyo khawchhungah Military council sipaiten zan lamah ralthuam lian hmanga an bomb thin avangin mipui veivak te leh chenna in thenkhatah chhiatna an tawh thin avangin mipuite zan lamah mi tu mah teichhuak lo turin thuchhuah an siam thu CNO/CNDF-Upper Chindwin Region-ten an sawi a.
“Zan dar 8, a chuan tawh hian chhim leh hmar bakah tlang atangin Military council sipaiten Laipuiin an sai tawp thin a, lirthei khalhte leh mipui veivak te kan him zawk nan tiin heti hian thu kan chhuah a ni” tiin CNO/CNDF-Upper Chindwin Region-a thuneitu pakhat chuan a sawi a ni.
He curfew thupek hi July 15 atangin August 31 thleng a awh dawn thu CNO/CNDF-Upper Chindwin Region-ten an sawi a.
July 6 pawh khan Military council sipaiten ralthuam lian nena an bomb-naah Tahan Ward-a nu pakhat a boral a, naupang pakhat a hliam bawk a; July 14 pawh khan Chichai khuaah bomb tlak avangin nupa an boral bakah tualchhung mi 5 an hliam thu hriat a ni bawk a ni.
