Chin State, Kanpalet township leh Magway region, Saw township inkarah CDF tangrual pawl leh Military council sipaite inbeihnaah Military council sipai 5 aia tlem lo an thih bakah hliam an awm nual thu CDF-Kanpalet, Khonu battalion-a thupuangtu chuan a sawi a.
July 18, zing dar 7,8 vel khan Kanpalet township, Masawtui khua leh Saw township, SueLeCin khaw karah Military council sipai 300 rual leh CDF tangrual pawl te an inkap nasa hle a.
“CDF mi pakhat na vak lo a hliam a, Military council sipai 5,6 vel an thi niin kan hria. CDF-ten an rukin an lo kap a, inbeihna a la nasa mai thei, Masawtui khuaah mi tu mah an awm tawh lo” tiin Khonu battalion-a thupuangtu chuan a sawi a.
Military council Telegram-ah chuan July 14 khan Saw township, YeKin khuaa inbeihnaah CDF tangrual zinga sipai 5 an thi a, ralthuam tam tak kan laksak tiin an tar lang ve thung a ni.
Chin State chhim lam, Kanpalet township, CinDwe khuaa ralthuam leh ration phur Military council sipaite chu CNA, Kanpalet CDF leh Chin-Magway ramri-a CDF battalion-ten July 14 atang khan vawiin thlengin an beih rawn thu hriat a ni a.
Chin State leh Magway ramri-a tualchhung mipui 2000 chuang vel te chu in leh lo an tlansan hlawm a, he operation hi a thla tel a awh theih avangin raltlante leh CDF battalion te tan, In chung khuh, ei in tur leh damdawi an mamawh zual thu hriat a ni bawk a ni.
