Sagaing region, Kalaymyo-a Military council sipaiten mipuite chenna hmun hrang hrangah ralthuam lian, Laipuiin an tawngpawng bomb nasat thin avangin chhiatna an thlen nual thin thu hriat a ni a.
July 19 zan dar 7 vel khan Kalaymyo atanga ni tlakna lam Letpanchaung khaw lamah Military council sipaiten ralthuam lian Laipuiin an bomb thu CNO-UCR-ten an thuchhuahah an tar lang a.
“July 19 khan inkah buaina eng mah a awm lova, Military council sipaiten Letpanchaung, Tuingo, NyaungKone khaw chhehvelah leh SaKhanGyi bakah NanMoh khuaah te Kalaymyo-a 228 battalion-ten an bomb nasa khawp mai” tiin PDF te leh a hnaivaia miten an sawi a ni.
Military council sipaiten Laipuia an kah chhuah avangin PyiDawta, Letpanchaung leh NanChaung khuaah bomb a tlak avangin chenna in an chhiat nual thu hriat a ni bawk.
