Chin State, Mindat township base, Khah Lah Yah (IB) 274 battalion-a Military council sipaiten Mindat khuaa Zo hnahthlak Pastor pakhat leh kohhran upa 3 te chu an sawisak hnuah an thah thu Mindat township-a Public Administration te hnen atanga hriat a ni a.
“An chhungten an zawt a, kan hre lo an ti a, a hnuah a that ringawt a, a bula mi te pawh an sawisa tel a. An sawisakna thawm kan hriat hnuah an ruang kan dil pawhin kan hre lo tiin min pe duh lova, an thih ngei chu kan ring bawk sia” tiin Mindat township-a Public Administration thuneitu Ko Yaw Han chuan a sawi a ni.
Mindat khua tlak lam, Biak in-a raltlante camp bulah Bike inhung a tam lutuk an tih avangin Military council sipai IB 274 battalion-ten, an rui lungpuangin Pastor pakhat telin kohhran upa 4 an man thu hriat a ni a.
Heng an man te hian raltlan te an tanpui thin thu an hre leh a. July 26 khan an man a, ni 10 hnuah an chhungten an zawt a, an man loh thu an sawi thung a. A hnuah an sawisak hlum nia an rin thu hriat a ni a.
Pastor leh kohhran upate an thatna chungchangah Mindat township-a Public Administration-ten an dem hle thu July 27 khan an thuchhuahah an tar lang a ni.
Heng avang hian Military council sipaite an chet velna chungchangah mipuite tanrual a tulzia Mindat township-a Public Administration-ten mipui te an hriattir bawk a ni.
