Sagaing region, Tamu township, Khampat khua No.2 Ward-ah July 28 tuk khan Military council sipaiten luhchilhin an inkap a.
Inkah thawm a reh hnu rei lo teah No. 2 Ward-a Bike-a inphur unaute tei chhuak chu Bike khalhtu kum 26 mi, Lalremruata an kap hlum a, a hnunga chuang kum 35 mi Lalzirliana a hliam bawk a, enkawl mek a nih thu hriat a ni a.
An kah hlum tak Lalremruata ruang hi Kalaymyo-ah phur pheiin an vui nghal a. Chawhnu dar 2 chuang vel khan Kalaymyo atangin Helicopter 2 a thlawk phei leh a, pakhat chuan Field-ah sipai a thlak nual a, pakhat dang erawh chu khawchhunga chenna inte a bomb thu hriat a ni a.
Khampat khuaah hian July 22 atangin July 28 thleng khan Military council sipaite leh tualchhung PDF tangrual te an inbeihna avangin tualchhung mi 2000 chuang an tlanchhia a, tualchhung mi 3 an boral tawh thu hriat a ni bawk.
