Sagiang region, DaBeYin township-ah Military council sipaiten ralthuam liana an beih nawn leh avangin khaw 20 chuanga tualchhung mi 10000 chuang an tlanchhiat thu Ye U khuaa innghat People’s Defence Comrade, information pawl zinga leader Thu Khan Zaw chuan Yangon Khit Thit Media a hrilh a.
August 2 tuk khan DaBeYin township chhuah lam zarah Military council sipai 150 rualten luhchilhin ralthuam lian nena an bomb avangin khaw 20 chuanga tualchhung mi 10000 chuang in leh lo an tlansan thu hriat a ni a. He inbeihnaah hian Military council sipai 10 chuang an thi nia hriat a ni.
July 31, zan pawh khan DaBeYin township leh Ye U township chhehvelah Military council sipaiten an luhchilh avangin khaw 23-a tualchhung mi te vawiin thlengin an la tlanchhiat thu hriat a ni bawk.
“August 2 tuk khan DaBeYin chhuah lam zarah raltlan mi 10000 chuang an awm belh a. Ye U khaw chhim lam zar Pa Nih Kat khuaa ni 2 chhung, buk khuar mek, Military council sipai Khah Lah Yah (IB) 708, 702 operation te chuan DaBeYin huam chhung khuaah an luhchilh a. Tunah hian DaBeYin chhuah lam zar MaYaKan khuaah buk khuarin chenna in an hal mek” tiin Ye U khuaa innghat, People’s Defence Comrade, information pawl zinga leader Thu Khan Zaw chuan a sawi a ni.
Tun dinhmunah hian khaw hrang hrang atangin tualchhung mi raltlan mi 20000 dawn vel an awm mek a, an awmna leh ei in chungchangah harsatna an tawk mek a, tanpuina an mamawh hle thu thuneituten mipui te hnenah an tlangau thu hriat a ni.
