Chin State-ah MOCHA thlipui an tleh hnu thla 3 chhungin chhawmdawlna duhthusam an la dawn loh avangin township hrang hrangah chenna in sakna atan chakkhai an mamawh thu hriat a ni a.
Township hrang hrangah ram dang atanga tanpuina an dawn mai loh bakah Military council sipaiten kawng lakah an dan thin avangin harsatna an tawh thu ICNCC member Salai Min Nyo chuan a sawi a.
“Chin State huam chhungah May 14 khan MOCHA thlipuiin a nuai a, Tonzang khawpui tel lovin township dangah chenna in 2774, School 185, sakhaw Biak in 102, Clinic 12, Chhek in 259, Public hall leh vangtlang in 6, a vaiin 3338 a chhiat thu ICNCC-ten an thuchhuahah an tar lang a ni.
Chin State-ah hian Kanpalet township hi inkal pawhna kawng chhengchhe tak a ni a, MOCHA thlipui avangin silh leh fen, ei leh in, bung leh bel bakah chenna hmun thlengin an harsa hle a. Kawng chhia leh leimin, phone a hman theih loh bakah chhawmdawlna kawngah an harsat thu raltlan zinga thuneitu pakhat chuan a sawi a ni.
Military council sipaiten Halkha, Falam, Tedim, Paletwa, Midat leh Matupi township-ah MOCHA thlipui avangin chenna in a chhiat nual avangin Military council-ten Kyats maktaduai 372824-in kan tanpui tiin July 7 khan an thuchhuahah an tar lang thung a ni.
