Myanmar ram chhungah hriselna enkawlna chungchangah duhthu a sam loh laiin Covid-19 enkawlnaah tan a lak thu, East Asia Forum chuan a tar lang. NLD hun lai 2020 February leh April thla khan khawvel mi thiam filawr te nen Covid-19 invenna an thawhho lai chuan boruak a ziaawm hle a.
Kumin February thla atanga Sipaiin sorkarna an pawng lak hnu hian NLD sulhnu te nen an in hmachhawn ta zel a. February ni 3 khan damdawi lam thiam mi70 zet chu CDM-ah an lut nghal a. Covid-19 chungchangah an inthlahdah a, rawng takin mipui chungah an inluling ta a ni.
Military Council hian CDM-a lut ta te hi an ban a, lung in an tantir bawk a. Covid-19 invennaa an hotu Dr. Tha Tha Lin leh a pasal bakah naupang tiamin mi 7 an man a.
June thlaa Covid-19 Vaccine an chiu hnu khan, Dalta chi dang a chhuah leh hnu, July thla laihawl atangin ni tin mi 6000 chuang hri kai an pun belh zel a. Military council, Ministry of Health chuan March ni 23 atang khan Positive mi 400000 chuang niin mi 16000 chuang an thih tawh thu an tar lang.
Khawpui hrang hrangah Covid-19 vanga awm te Military council te avangin Vaccine chiu theih lohna hmun a awm nual a. June thla atang khan zirna school hawn tan a ni a, July thla atangin ram chhungah Covid-19 third wave an hluar leh avangin inenkawlna chungchangah Military council ten an dang chat zel a.
Tlawmngai pawl an man a, oxygen-ah harsatna an tawk a, mipui an timangang hle a ni.Mipui te mamawh tur damdawi leh hmanraw chi hrang hrang an thunun vek a, thil man an tisan vak thu East Asia Forrum News chuan a tar lang.
Lung in tang te pawhin Covid-19 an kai nasa a, NLD hruaitu U Niang Win pawh Covid-19 vangin a boral a. ASEAN Covid-19 tanpuinain China leh Russia siam Vaccine, ram chhung mipui 20% chiu a tum mek laiin Military council te beih mek mipui ralthuam keng te China siam Covid-19 Vaccine hmangin an chiu mek thu a tar lang bawk.
China siam Sinopharm COVID-19 Vaccine Maktaduai 4 chu Thawhtanni khan Yangon-ah a thleng leh tawh a. Myanmar-a China Ambassy chuan ‘ Tun thleng hian Vaccine Maktaduai 12,6 a thawn tawh a, chung zinga Maktaduai 3.9 chu a thlawna pek liau liau a ni’ tiin a sawi.
Tunah hian Myanmar ram chhungah Covid-19 Vaccine chiu tawh hi mi Maktaduai 3 an chuang tawh a, hman ni lawk Inrinnia dose khatnaa chiu te hi mi Maktaduai 1.7 an ni.
