Myanmar ram chhunga township 330-a People Defense Force (PDF) pawl zawng zawng chu ralthuam pek vek an nih tur thu Natioanl Unity Government hnuaia Natural Resource Minister chuan a FB kaltlangin tun hnai khan a tarlang a.
Ani chuan, “Tunah hian ralthuam pek vek tumin kan bei mek a, Township 330-a thleng kim vek tur chuan nghah deuh a ngai ang. Ram chhunga PDF maktaduai chuangte mamawh chu a tam tham hle a. Township pakhat tan silai 100 pawh lo pe dawn ila, silai 33000 vel a ngai dawn a. Tun thlenga thawhhlawm kan dawn US dollar maktaduai 17 manin silai lei ta ila, 5000 vel chiah a daih dawn a. A mak khawp mai tunah chuan chu ai pawhin a tam tawk zawk a ni,” tiin a tarlang a ni.
NUG sorkar nena thawkho indona tak tak beitu PDF pawlte nen chhun lo chat lova an inbiak reng thu leh PDF der te laka fimkhur tur pawhin a sawi lang tel a. Chutih rualin mahnia tualchhung pawl din PDF te chu an hruaitute fin thiam a pawimawh hle a, chutih rualin NUG Defense Ministry hnuaia awm PDF pawlte chu an ralrel dan, technology lam leh thil dang skill-ah an tawiawm reng, a tlem thei ang bera thi leh hliam awm tura chhut a pawimawh thu leh kan tum a inan phawt chuan eng pawl pawh nise, kan thawkho vek tihna a ni tiin a sawi a.
Chu bakah NUG-in thawhhlawm a dawn Dollar maktaduai 17 chuang chu khawia hman nge a nih dawn tih chungchangah – ralthuam lei nan, military training nan leh CDM te chhawmdawl nana hman tur a nih thu leh, dollar maktaduai 17 chu eng tham mah a nil ova, NUG sorkar budget mamawh zawng zawng chu dollar maktaduai 800 vel a ni, chu pawh chu rei lotea hmuh beisei a nih thu a tarlang bawk a ni.
