September ni 7, D-Day puan ni atanga chawlhkar hnih a vei hnuah military council kut hnuaia thawk staff sipai leh police 453 chuan sipai dodalin CDM zawm tura an rawn biak pawh tawh thu National Unity Government (NUG) sorkar hnuaia Defense Ministry Secretary U Naing Thu Aung chuan a sawi a.
Ani chuan, “Hetianga bei let ve tura indona kan puan tak, September ni 7 hnu atangin ni khatah mi 33 velin mipui lam tang turin min rawn pe pawp reng a. Chuvangin, D Day puan hnuah mipui lam tang thar chu zaa 20 velin an rawn tam chho tih a hmuh theih a ni,” tiin a sawi a.
February ni 1-a sipaiin thuneihna a pawng lak atanga September ni 6, NUG-in D Day a puan hma thleng, thla 7 chhung khan military council phatsan a, thuneihna dodaltu sipai 1500, police 1000, an vaiin 2500 an awm tawh thu CDM security force-te tanpuitu Myanmar Police CDM Channel chuan RFA a hrilh a.
Chuvangin, September ni 7 hnu lama CDM zawm mi 400 chuang nena belhkhawm chuan thuneihna pawng lak a nih, thla 8 chhungin, mipui lam tang tura CDM zawm sipai leh police te chu 3000 dawn an awm tawh tihna a ni. Mahse, military council lam chuan he thu hi chiang taka thuchhuah siam a la nei miah lo thung a.
NUG-in September ni 7 hnua CDM zawm sipai leh police 453 tia a chhinchhiah zingah mi 50 chu a taka tlan chhuakin, CDM an zawm tawh a, mi dang 400 dawn chu sipai leh Home department tlan chhuahsan turin hun remchang an nghak mek niin Defense Ministry Secretary U Naing Thu Aung chuan a tarlang bawk a.
Tunah hian sipaiho chhungkuaah inventhawnna leh inenthlakna a nasa chho hle a, hmun thenkhatah chuan sipai nupui thenkhat chu pawn chhuaka, bazar pawh an phalsak lo, pawn chhuah dawn pawhin dilna hmun hrang hrang atanga lak a ngai a, dam lohna thilah lo chuan a chhuah mai mai theih lo a. Sipai hmun atanga pawn chhuah phalna hmuh pawhin mahni hak lai bak thawmhnaw leh thil dang ken chhuah an phalsak lo tih hriat a ni.
Sipai chhungkaw zinga mi pakhat chuan, “Sipai hmun thenkhatah chuan bazar tura chhuah pawh a theih loh. Mahse, hmeichhe sipaiho chu phalna lain an chhuahtir a, phalna la tur chuan hmun hrang hranga dil kual a ngai zel bawk. Chhuah phalna neih pawhin zan tam riah chhuah chu an phalsak lo,” tiin a sawi.
Chutih rualin sipai battalion leh division-a awm sipai chhungkuate chu thla khatah vawi khat an inhmukhawm thin a, chutah chuan NLD party vote tihchingpen dan te, Daw Aung San Suu Kyi-in kum 5 liam ta chhunga ram hmasawnna a thlen theih loh dan te, sipai hotuten ram kaihruai tura hmeichhia hotua neih thu an pawm theih loh thu te inhrilhin an intlem a, an infuih thin thu, chutiang hun hmannaa tel thin sipai chhungkaw zinga mi pakht chuan RFA a hrilh a ni.
Tin, sipai chhungkaw zingah thuneihna lak chhan tak pawh hre chiang lo tam tak an la awm a, chuvangin, Min Aung Hlai chuan tun thlengin a sipaihotu thenkhat chu thuneihna an lak chhan, an thiam thute sipai lu bawkte leh an chhungte hrilh thin turin ruahmanna a siam a.
Mandalay region, Mingyian khaw mi pakhat chuan, “Sipai leh police ho hian CDM an lut tur a ni. Mi pakhat hian hna a thawh reng rengin, a hna thawh chhan chu rinna a neih vang, hlawkna leh hamthatna a hmuh dawn vang te a ni thin a. Mahse, military council hnuaia thawkte tan chuan Ram tan tih thupui hmanga indona chhan tur a awm tawh lo. Mipuite tan tia indo pawh a ngai lo. Chuvangin, an thil tih chu awmze nei lo a ni tawh. Military council hnuai atanga indo tur an nih chuan a dik tawh lo lutuk. Mipui hmangaihna leh zahna pawh an dawng lovang. Zahawmna leh hming thatna pawh an nei hek lo ang a, sum leh hausakna pawh an hmu tawh kher lovang,” tiin a sawi a.
Ama duhthlanna ngeia CDM lut Captain Lin Thet Aung chuan ‘military council hnuaia thawk sipai leh police te CDM-a an rawn luh tam pauh leh, sipai lam an chak thei tawh dawn lova, tichuan mipui thisen chhuak tlem thei ang berin sipai lamin an thuneihna hi an kalsan mai kan ring a ni’ tiin a sawi bawk a ni.
