Yangon region, Sanchaung township, Minikone lei chhukna bulah September ni 25 zing lam dar 1:30 vel khan military council sipaiten thalai 4 chu building in chhawng atangin an pawt thla a, nghaisa zuiin an that tih hriat a ni.
Chung sipaite tihhlum tak thalai 4-te zingah CDM tlawmngai pawl Doctor Zin Lin leh Yangon khum 500 lenna damdawi in puia thawk thin nurse Ma Khin Khin Chuai te an tel thu hriat a ni a.
Anni chu sipai thuneihna dodalna kawng hrang hrangah an tel a, firfiak sipaiten September ni 25, zing lam dar 1:30 khan in chhawng atanga hnuk thlain kawngah thisen chhuak zawih zawihin an chhuih a, thi lek leka dah a, an nghaisak zui hnuah an nunnain a tuar ta lo a. Dr Zin Lin-a chuan hmeichhe nausen thla khat mi vel lek a kalsan a, ani hi Myanmar rama Covid-19 hluar vang lai July thla chhunga tlawmngaia covid enkawlna hnaa lo in hmang zo ve tawh kha a ni a. Chutiang bawkin, Nurse Ma Khin Khin Chuai pawh Covid natna enkawlna kawngah tlawmngaia thawk, hruaitu pakhat a ni bawk.
Minikone lei chhuknaah chung thalai 4 te chu sipaiten rawng taka an thah hnua, military council chuan ‘Sipaite an kaha vangin sipaiten kap let a, hmeichhe pakhat, mipa pathumte chu hliam nasak an tuar’ tiin dawtin thuchhuah an siam a.
Khit Thit media chhui chianna leh video evidence atang chuan inkap tawn ni lovin, sipaiten thalaite chu manin, building in chhawng atangin an hnuk thla a, khawpui thim thamah nghaisain an that a. Sipai lamah thipui khawp hliam tawk an awm thu tarlan pawh dawt thu vek a nih thu a lang thung a ni.
Ni zan lam pawh khan sipai lamin thil dap kual an nei leh bawk a, Sanchaung township-a thalai pakhat chuan, “Nizan lama an rawn zawn tak chu Khit Thi media-a tarlan video clip avangin, he lai velah an reporter a awm ang tiin, video chu an entawn kual a, building chhawng chungah te an lawn a, room hrang hrangah lutin video lakna tur awm ang an zawn rualin an mi rinhlehte chu thu zawt fiah turin an ko ta a ni. Chanchin kimchang chu hriat zui a la ni lo,” tiin a sawi.
