Indonesia Foregin Minister chuan ASEAN leh Myanmar inkara inremna Concensus 5 te a taka chantir tumnaah eng rah chhuah mah a awm thei lova, Myanmar tana ASEAN palai bik ruatna kawngah pawh Myanmar lamin eng thu leh hla mah an chhuah bawk hek lo a, a beidawn thlak khawp mai tiin October ni 4-a ASEAN foreign Minister ho Online meeting-ah a sawi chhuak a ni.
Chu mai duh tawk lovin, Malaysia Foreign Minister chuan, ‘Myanmar ram harsatna chenfel tumnaah ASEAN palai bik nena thawhhona hi an hnar a nih chuan ASEAN summit lo awm turah Myanmar ram chu telh loh theih’ a nih thu a sawi chhuak bawk a.
August thla khan Myanmar ram tan bik tiin ASEAN special envoy Brunei Deputy Foreign Minister Erywan Yusof chu ruat a ni a. Myanmar rama a kal a nih chuan Daw Aung San Suu Kyi leh mi tang pawimawh zualte hmuh ngei a tum a, mahse military council lamin hmuh a rem loh tur thu an sawi lawk a. A hmaa ASEAN palai lo kalte pawh military council chuan Vice president 2-na Henry Van Thiau leh mi pawimawh dang tlem te chaih an lo hmuhtir tih hriat a ni a. Chuvangin, ASEAN ram hrang hranga hruaitute chu an beidawng ru hle a.
Chutih rualin Myanmar sipai hruaitute pawh an bang bik dawn lo tih a hriat theih a. A tir atangin ASEAN ramte chu lam atanga siam tumin an vir buai ve hle a, chutia meeting pawimawha an tel theih dawn loh chuan an role, nihna leh an pawimawhna te chu ASEAN ramte lakah pawh an humhim zo tawh lo tihna leh thenawm ramte pawh an lamah an tang tawh lo tihna tluk a ni dawn a, a mualpho thlak hle dawn a ni.
