Myanmar mipui tam zuk thin, London leh Lucky Strike Cigarette siamchhuaktu British American Tobacco Myanmar L.td chu khar a nih tawh thu hna thawkte hnen atanga hriat a ni.
He factory hi Hlai-Ta-Ya township, veng no. 14, Shwe Than Lwin Industrial zone-a awm British American Tobacco Myanmar L.td a ni a. He factory atanga cigarette siamchuahte chu Kent , London leh Lucky Strike te a ni.
He meizial (cirgarette) siamchhuahna khawl (factory) khar chungchangah staff pakhat chuan, “Factory khar chu a dik a, chutih rualin siam chhuah leh zawrh chhuahna (distribution) lam thlenga tihtawp vek a ni. October ni 6 atanga khar tan a ni,” tiin a sawi.
Company lam chuan hna thawktute hlawh lak tur la bang chu October ni 20 hma ngeia pek chhuah an tum thu thuchhuah an siam tawh a. Chutiang bawkin Agent-te leh a hralhtute chu British American Tobacco Myanmar L.td chuan October ni 6, 2021 khan an thil siam chhuah leh hralh chhuah zawng zawngte an tihtawp thu hriattirna an lo pe vek tawh tih hriat a ni bawk a.
Kent , London leh Lucky Strike Cigarette te chu Myanmar ram chhungah mipui ngaihnat leh hralh chhuah tam ber thin ni mah se, Myanmar politics chiang lo leh harsatna chi hrang hrang avanga, ngai pawh awh zo lova an kal tak avangin, Myanmar ram atanga an inthiar chhuah a ngaih tak thu sumdawnna lama mi thiam pakhat a sawi a.
British American Tobacco Myanmar L.td hi kum 20213 July ni 8 khan Myanmar ramah hawn tan niin, I.M.U Enterprise nena collaborate-a thawk company pakhat a ni .
Chutiang bawkin ram 36-a retail-a zawrh chhuah hna thawk company pakhat Metro Wholesale Myanmar pawhin October thla tawpa chawlh an tum thu September thla khan thuchhuah a lo siam ve bawk a.
Myanmar ram chhungah Covid-19 buaina leh politics lama buaina avangin, kum 2020 March thla atanga kum 2021 September thla chhung khan ram chhunga thil siamchhuahna factory 448 zet chu khar a nih tawh thu Ministry of Industry Department atanga hriat a ni.
