Sagaing region, Kalaymyo atanga Chin state hmar lam sumdawnna hmunpui Rihkhawdar lama tlan thin motor-te chu police leh sipaiten pawisa tam tak an lo dil thin avangin, driver-ten harsatna an tawk mek tih hriat a ni.
Kalaymyo atanga Chin hill lama kal, Kalay-Khaikam-Tedim-Rih kawng tlauna gate leh police, sipaiten a tlem berah motor pakhatah Kyat 5000 zel an lo dil ve thin bawk avangin, pek a ngaih thin thu driver pakhat chuan a sawi a.
Ani chuan, “Tun hmaa kan lo pek thin aiin an tam deuh a, tunah chuan cheng 5000 vel zel an khawn a, Rih thlenga kan kal chuan pek zel a ngai bawk si a, cheng 30000 chuang sen a ngai a, Khaikam gate-a hming ziah hnua pawisai dah luh pawhin police hovin, engzat nge i dah luh kha tiin min zawt thin a, sangkhat ka dah tih chuan sang 4 dah belh leh rawh tiin min tilui a. An sawi dan chuan min rawn kap leh a nih chuan cheng 5000 kan khawn belh leh ang, tiin keini driver te hnenah min hrilh a, pek tur leh pekna a tam avangin, driver-te tan a buaithlak khawp mai,” tiin a sawi.
September thla khan Khaikam mel 9 lirthei lut chhuak check-na Gate leh Police station chu PDF-Zoland၊ CDF-KKG tangrual pawlin an kap a, police 5 an thi hnuah gate lut chhuak tur motor-te chu an check uluk sawt hle a, Kalay-Tedim-Rih kawngah pawh military council sipaite an duhty nual bawk a ni.
Chutianga khual zinte, police leh sipai lamin pawisa an lo dil thin avangin, Kalay-Rih inkarah motor chuan man chu mi pakhatah cheng 15000 leh a chanve ni thin chu 50000 thleng a kai chho a, zin veivak miten harsatna an tawh phah a.
Hming tarlan loh pakhat chuan, “Kawngah police leh sipaite pawisa pek a ngaih tam em avangin, bungraw phurh man leh motor chuan man tih san loh theih a ni lo,” tiin a motor counter nghaktu pakhatin a sawi a.
Kalay-Rihkhawdar khaw inkara tlan thin mihring phur motor leh truck kal thinte chu ni tin 20 van an awm a, tun hnaiah earwh security lam thil avanga chawl engemaw zat pawh an awm bawk a ni.
