Police department lama mihring indaih lohna avangin, police nupuite chu silai phelh darh leh remkhawm, a kah dan zirna, military training thla 1 nei ngei ngei turin military council chuan thuchhuah a siam tih hriat a ni.
Myanmar police tanglai nupuiten an awmna police station chu venghim thei turin thla khat sipai training an neih ngei ngei a ngaih thu kaihhruaina leh ram pumah zirtirna pek a nih tan tawh thu police lam source atanga hriat chhuah a ni a.
Tun hma chuan, silai phelh, remkhawm leh a kah dan zirna chu security force chhunga awmte chauh zirtir thin an ni a, sipaiin thuneihna an lak hnuah erawh police station chhunga awm an nupuite pawh zirtirna pek tan an ni.
Sipaiin thuneihna an lak hnuah police department-ah force mamawh belh niin, revolution pawl mi leh sate man turin police an indaih lo hle a, station pawn chhuahsan a ngai huna station venghim tur talin police nupuite chu thla khat sipai training pek an nih thu, police pkhatin DVB a hrilh a.
Ani chuan, “Tunah eng rilru nge an put pawh ka hre lo, hetiang training han pek tak mai chu. Battalion-ah chuan tun hma pawhin an pe a. Tunah chuan intuaithar lehna tur nge, silai kah zirna hmunah an tihtir dawn nge dawn lo pawh ka hre lo,” tiin a sawi.
Police station-a awm police nupuite hetiang training pek hi a vawi khatna a ni a, silai kah zirna hmuna an kaltir dawn leh dawn loh chu hriat a la ni lo.
Silai phelh vuah, remkham leh kah zirna basic training chu station-a awm hmeichhiaten an zir ngei ngei tur a ni a, training-naah camera leh phone ken phal a nih loh thu hriat a ni.
CDM police pakhat chuan, “Keini military training chu a dan tur taka kan zir pawhin thla engemaw zat a rei a. Sawi dawn chuan an ngaihtuahnaah silai kahtir ringawt a awm a. Ral beih dan tak tak a ni lo. Hei hi thil tih loh tur a ni a, hmeichhe police te pawh an awm tho a, chu tih laia police nupuiho han koh leh chu thil tih chi a ni lo,” tiin a sawi.
Myanmar ram chhunga township tinah police station 3 atang 5 inkar a awm a, Township pakhatah Myomah police station force 70 vel awmna leh bial chhung police station -ah chuan force 50 aia tam lo an awm zel bawk a ni.
