Febraury ni 1 atanga thuneihna la a, mipui pawisa lo tam tak nunna suattu military council chet dan chu International leh ram chhung dan ang pawha Firfiak (Terrorist) pawla chhiar theih a nih thu Special Advisory Council for Myanmar (SAC-M) chuan finfiahna tam tak hmangin thuchhuah an siam a ni
Myanmar sipaite chu firfiak pawl an ni a, International Terrorist pawla ruat tur a ni a, mipui zingah hlauhna tuh lutin, sualna rapthlak tak tak an ti a, mahse a tawpah mipui lamin an politics policy duana tel turin an ti ve mek a ni tiin SAC-M chuan a tarlang a.
Thuchhuahah chuan, “February atanga thuneihna hmang khaw lova, Myanmar mipui chunga tharum thute chu mipui lamin Firfiak sipai tiin an ko tawh a. An sawi chu a dik a ni. Firfiakte chauhin hetiang sual rawng hi an bawl thin a ni,” tiin SAC-M-a Yanghee Lee chuan a sawi.
National Unity Government (NUG) chuan sipai pawl chu Firfiak pawlah a puang tawh bawk a, UN leh khaw ram dang sorkar te pawhin Firfiak pawla puan mai chi a nih thu leh, chutiang chhiar a nih chuan inbiakna a ngai tawh lova, R2P dan anga ralthuam lei leh hralh khapsak, sum lut chhuak dan chah leh an sual ngaihdamna tihtawp a nih tur thu SAC-M chuan a tarlang a. Chutih rualin Myanmar sipaiten mipui chungah rawng taka tharum an thawhna, finfiahna leh chanchinte chu SAC-M lamin an puangzar nghal bawk a ni.
