Military council sipai pawlin Chin state-ah operation nei a, chenna in an hal chhiat chu indona hmuna thil thleng pangngai mai ni lovin, Chin mipuite tisa leh rilru lam thlenga ding khaw chhuak thei lo tura an tih luih a nih thu Chin National Front (CNF) thupuangtu Salai Thetni-an a sawi.
“Chin state-ah military council-in indona a chawhchhuah dan enin, Chin mipuite in leh rosum, biak in telin 600 dawn chu meia hal chhiat a ni a, mipui an that a, hmeichhe chungah tharum thawhin mipat hmeichhiatna thlengin pawisak nei lovin, an che a. Chu chu indona satliah a ni tawh lo tih ka sawi duh a ni. Chung chu thil mawi lo ber, mihring chunga hleihlena sual rawngbawlna niin ka hmu a, chutiang chuan Chin mipuite politics, business, social lam thil leh rilru lam thleng, ding khaw chhuak thei tawh lo tur leh Chin mite Chin state-a awm thei lo hial tura ruahmanna niin, kei chuan ka sawi duh a ni.”
Thuneihna latu military council chuan Anaw Ya Tha operation hming vuahin, Chin state pum pui chu October chawlhkar khatna atangin sipai tam tak hmangin Chin state township 8-ah operation a nei a, chenna in tam tak an hal chhe vek bawk a.
Thuneihna latu military council chuan Chin state Thantlang khuaah biak in 5 telin chenna in 550 chuang chu thla thum chhungin a hal chhe vek a. Chu bakah Chin state township danga Falam, Mindat, Kanpalet township chhung, khaw hrang hranga chenna in te pawh a hal chhe bawk a ni.
Military council sipaite chuan mihring chenna in hal chhiatsak mai bakah, Chin hmeichhiate chungah mipat hmeichhiatna hmang khaw lovin, Tedim township A-Luai khuaa raipuar leh kum 3 mi naupawm lai hmeichhe pahnih chu November ni 11 khan military council sipaiten an pawngsual bawk tih hriat a ni a.
Military council sipai pawl chu Chin state Tonzang township tel lovin, township 8-ah an inkulh vek a, hmunhma lak tumin operation an nei reng a, thal favang hun a lo nih takah chuan lei lam leh boruak lam atanga operation nasa zawka kal pui an tum a rinawm thu Salai Thetni chuan a sawi bawk a ni.
