Mipui hmaa Min Aung Hlaia a inlanna chawlhkar khat a nih tak avangin, ngaihdan chi hrang hrang sawi a awm a. Thenkhatin Covid-19 a kai vang tih an awm laiin, thenkhat chuan kawng ruh cancer a neih vang ti an awm bawk a ni.
Engpawh nise, thil chiang tak pakhat chu inthlan result leh vote thlak dan dik lo chhuan lamah siama Democracy kalphunga thlantlin sorkar paihthla a, kum khat zet thuneihna pawng laktu leh amah dodaltu mipui 1500 chuang thattu silai hotu ber mipui hmuh theihna a inlan lohna chu ni 7 a nih tawh thu chu a chiang hle a.
Min Aung Hlaia chet vel dan enthlatuten, mipui hmaa a inlan thin dan chu hre chiangin, hetianga a inlan tak loh rei danah ngaihdan chi hrang hrang an nei zui nghal a. Thuneihna lak a nih hnu, ni kum khan hun engemaw chen chu a inlan lo ve zawk a. A tlangpuiin ani chu sorkar department meeting hrang hrangah inlanin thuchah sei tak tak a sawi loh leh sipai camp khawiah emaw kalin thuneihna an lak chhante chu sipai chhungkuate a hrilh fiah vel thin a ni.
Mahse, tunah chuan chalkkar khat zet a bo tawh a. Ani chu February ni 27-a Naypyidaw-a sakhaw lam thil tihna hmuna state-ah military council lal dangte nena hmuh a ni a. Chu mi hnuah hmuh tur a awm tak loh rualin, ram chhungah power supply a mumal lovin, thil man a sang chho zel a, military council roreltuten chung thila sawihona (meeting) engmah an buatsaih lo bawk a.
Tun hnai lawka Pago region-a lam a tlawh tumna program pawh chawpchilh taka thulh leh a nih takah chuan rinhelhna tur chhan a titam leh zual niin sipai lam source pawhin an sawi a. Min Aung Hlai hian harsatna lian tak a awm a nih loh chuan a zin program hi a tulh mai mai ngai a ni.
Thuneihna latu lu ber mipui hmaa a lan tak lohah chuan Online lamah a hnung zang ruh cancer vanga inenkawl anga sawi chu rin dan pakhat a ni a. Eng kawng pawhin mipui hmaa a inlan tak lohna chhan chu eng pawh nise, a lal hrawtna hnuaia awm, hun khirh tak tawng mek Myanmar mipui lawmah a tla tho a. Maynmar rama social media platform hman tam ber Facebook hmangtuten a chawlhkar khat a bo ta ringawt pawh chu an lawm hle thu an tarlang hlawm a.
Chung Facebook page-ah chuan Myanmar mipui tam zawkin a chunga an huatna a thuk hle a, a tlu chhe lai hmuh an chak dan an ziahnate chu amah ngei han chhiar se chu Min Aung Hlai-a lung a pawp thei hial ang tih a ni. Thenkhatte rilru leh duh dan takah chuan, ‘Tunah la thi rih suh. I nghawnga hrui hrual kan valh hun thleng lo nghak rawh,” tiin an ziak hial a ni.
