Mague region, Pauh township, KinMah khua chu April ni 18, chhun dar 12-ah firfiak sipaite, police leh Pyusawhti pawl telin force 50-in lutchilhin, chenna in an hal chhe nual a, in 250 vel awmna khuaah in 20 chiah a bang tawh nia hriat a ni.
Tualchhung mi pakhat chuan, “Silai hmet puakin khaw chhungah an rawn lut a, khaw mi thenkhat chu an tlan chhi a. Kawng lakah naupang pahnih leh nupa an man a, naupang pahnih chu an hruai daih a. A hma kang chhe tel lo in te chu an hal nawn leh a. A khaw pumin kan tlan chhe tawh a, in nei pawh mahni inah an awm ngam lo a ni,” tiin RFA a hrilh a.
Tualchhung mite chu a vawi khat an rawn hal tumin ramhnuai lamah tlan chhiain an biru a. In 250 chuang awmna Kinmah khua chu nikum June ni 15-ah a vawi khat nan an hal a, chenna in 153 a kang chhia a. Chung zinga la bang in 90 zingah 70, hal nawn leh a nih takah chuan tunah chenna in 20 vel chiah a bang tawh a ni.
A nihna takah chuan khaw chhungah tumah an awm lova, inkahna pawh a chhuak lova, firfiak sipaiho chu rawn lutin an rawn hal leh ringawt mai a. Vawiina an awm laiin inbiak pawhna engmahin hna a thawk thei lova, tlai lamah chiah a rawn tha leh a ni tiin tualchhung mi pakhat chuan RFA a hrilh ve bawk a.
Khaw mite chu, sipaite kal chhuak tawh mah se, hlauhna avangin, an thenawm khaw hnaiah pawh an la lut ngham lo a ni.
Data for Myanmar chuan kum 2021 April ni 1 atanga kum 2022 April ni 13 thlenga a chhinchhiah, military council thuhnuaia awmte avangin Myanmar ram pumah chenna in 9187 hal chhiat a ni tawh a, chung zinga in 1814 chu Maguei region-a mi a nih thu a tarlang.
