Khaw chhiat vanga thlawhna chuang ngam lo leh rahpuah bomb hlauh vanga motor chuang ngam lo, Min Aung Hlai chu special rail-in a ruka Mandalay a kal thu hriat a ni
Firfiak sipai hotu ber Min Aung Hlai chu April ni 19 zing lama khaw chhiat vangin thlawhna a chuang ngam lova, motor kawnga bomb rah puah a hlauh bawk avangin, PyinOo Lwin (Maymyo)-a ni engemaw zat a cham hnuah a rukin PyinOo Lwin – Mandalay special express rel, compartment pahnihnaa a chuan thlak thu hriat a ni.
Min Aung Hlai chu PyinOo Lwin-ah Tuitheh kut chhung zawng a awm a, April ni 19, dar 8:45 velah special express rel-ah a ruka chuangin Mandalay lam a chhuk thla a.
Myanmnar railway-a thawk pakhat chuan, “Zan atanga a tuk zing thlengin he lamah khawpui ri leh tek tla ri hriat tur a awm deuh reng a, thlawhna a thlawk chhuak thei lo pawh a ni mai thei. Motor pawhin kal se, PyinOo Lwin leh Mandalay chu darkar khat pawh a rei lo. Anni VIP motor nen chuan minute 45 vel chiah a ni ang. Tunah chuan relin a rukin a chuang haw a. Chutiang chu a ni. Rail station-a staff te chu sipaiho nen tangrualin security a laktir a ni,” tiin a sawi.
Min Aung Hlaia chuanna relin station tin a tlan pel laiin, security chu station zawng zawngah police leh sipaite an awm deuh vek a, a chhuahsan tak PyinOo Lwin (Maymyo) khuaah tunah chuan sipai tlemte chiah an bang tawh thu hriat a ni.
