Akran state, Maungdaw hmar lama firfiak sipai border (ramri) vengtu sipaite awmna camp pakhatLeiya chu Arakan Army (AA) ten October ni 10, zing hma taka an lak thu hriat a ni.
Arakan lam news tarlan danin, AA lamin firfiak sipai deputy commandant telin sipai 30 vel chu kah hlum an ni a, sipai 14 pawh man an nih thu hriat a nih rualin, AA lamah pawh sipai thenkhat an thi a, mahse AA lam atangin confirm theih a la ni lo. Chanchin thenkhatin sipai 3 ang chauh man angin a tarlang bawk a.
Maungdaw township, Nanta tlang leh Ngakhuya khaw inkara awm sipai camp Leiyah chu Maungdaw hmar lama, Tinbawhla, Tayakone, leh Taungpyo khuate nen a inhnaih hel a, chutah chuan sipai lama lut Border Guard Force te an awm thu tualchhung miten an sawi.
AA thupuangtu Khaituhkhah chuan, “Tukin zing dar 4 velah inkahna nasa tak a chhuak a. Chu Leiya sipai camp chu keini AA lamin kan la tih hi a dik a. Chuta tangin ralthuam leh puakthei thil thahnem tak kan khawm a. Chu bakah sipai mante pawh kan nei. Mahse, kan sipai mante leh ralthuam khawmte list kimchang chu kan la dawng lo,” tiin Western News a hrilh a ni.
Tualchhung mi pakhat chuan, “Chu sipai chu BGF camp pakhat a ni a, vawiin chawhnu lamah military council jet fighter 2 rawn thlawkin an rawn kap let a. Zing lam dar 3 vel atanga intan niin kan hria. Minute 45 vel an inkah hnuah jet fighter a rawn thleng a. Chu mi hnu chuan laipui puak ri chiah kan hre tawh. Chu camp chu hal vek a ni a, a kang chu hlauhawm tham a ni,” tiin a sawi.
Maungdaw hmar lamah AA lamin August ni 30 khan mel lungphun no. 40-a BGF camp, September ni 11-ah LIB 352 camp leh September ni 15-ah Mitaih khaw bula military council ralthuam lian dahna campte chu laksakin, tunah BGF sipaiho awmna Leiya camp chu a laksak leh a ni.
August thla chhunga Arakan Army (AA) lamin press conference an neihnaah pawh Maungdaw hmar lama sipai camp 7 chu military council sipai lamin an tlan chhiatsan thu an lo sawi lang tawh bawk a ni.
