Air KBZ flight (thlawhna) Pitot Tube chhungah hnahthel dah luh chungchangah military council sipaiten mana an dawpna chu airline engineer chuan tuar lova a thih tak a chhung khat hnaiten an sawi.
He airline engineer thi ta hi kum 33 mi, Ko Min Min Soe a ni a, ani hi man tawk engineer zinga naupang ber a ni a. An dawp zawh hnu a, Insein jail lama thawn a nih laiin, a thi zui ta tih hriat a ni a. Hming tarlan loh pakhat chuan a thih chhan ber chu indawpna hmuna an sawisak nasa lutuk vang a ni, tiin a sawi a.
Ani chuan, “October ni 17 khan a thi a, Insein jail lamaah kan thawn a, chutah chuan a thi tiin an sawi a. An sawisak vak hnuah Insein jail lamah an thawn a ni hmel,” tiin a sawi belh bawk.
He airline engineer thi ta hi Non-CDM staff a ni a. Thlawhna Pitot tube chhunga hnahthel thlak lut tih chungchangah Air KBZ thlawhna khawl siamna department-a thawk a chanve chuang leh office staff thenkhat chu manin, thu zawh chian a, dawp an nih thu hriat a ni a.
A thian hnai tak pakhat chuan, airline engineer Ko Min Min Soe chu thalai a nih angin, dik lo taka an puhna chu a pawm thei lo a, an chhan let thin avangin, an sawisa nasa hle a, a nihna takah chuan an rinhlelh ho an man hnua an man belh lehte zinga tel ve chauh a ni tiin a sawi a.
Chu thil thleng bul intanna chu August ni 12 khan niin, Yanong atanga He-Hu lam thlawk chhuak tur ATR-72-600 chu a thlawh chhuah hmaa endik a nihin thlawhna pitot tube chhungah hnahthel hmuh a nih tak vangin, airline staff thenkhat chu military council sipaiin manin an dawp a, chu chuan thihna a thlen ta a ni.
