Australia ram khua leh tui economist professor Sean Turnell-a case chu April ni 21 khan court-in a ngaihtuah chhunzawm a, a thubuai chungchanga thuhretute thu zawhfiah an nih thu court lama miten an sawi.
Chawlhkar leha court ni turah pawh thuhretu pakhat thu zawhfiah tur a nil eh dawn a niin court lam source chuan a sawi bawk a.
Economist Sean Turnell chu Myanmar sorkar secret Act section 3-1 (c), Immigration Law bawhchhiaa puhin thubuai siamsak a nih bakah, a rualin state counsellor Daw Aung San Suu Kyi, U Soe Win (Management/Finance Minister), U Set Aung (Management/Finance/Industry Deputy Minister), U Kyaw Win (Management/Ex-Finance Minister) te chu thubuai siamsak an ni bawk.
Vawiin lama court a inlan zawng zawng chu an damin, an hrisel tha vek niin court lam source-in a tarlang a.
Military council chuan thuneihna a lak hnua a mi man foreigner tam tak chu ram pahnihte inthian thatna tur thlirin a chhuah zalen deuh zel a, mahse chutianga chhuah zalen zingah Australia mi Sean Turnell chu tun thlengin a la tel lo a ni.
Source lam chuan, chhuah zalen tur a nih dawn leh dawn loh chungchangah, tuna a case neihte chinfel a nih hnuah chauh a hriat theih dawn a, thutlukna siam fel a nih hnuah chuan chhuah zalen a nih ve mai theih thu sawi rik a awm a.
Mahse, he Economist, sumdawnna lama mithiam hian Myanmar sorkar leh China sorkar pahnihte inkara insumdawn tawnna piaha project lian tham, kum tam tak daih thei tura ruahmanna awm chu tha a tih pui lo a. Chuvangin, NLD sorkar laiin China project thenkaht chu mipui duh dan zulzuia tihtawp leh tihkhaihlak a ni zui ta reng bawk a. Chuta hlawkna teltu sipai lam chuan an haw hle a. Tuna sipaiin thuneihna an lakchhan pakhata sawi awm pawh China leh sipaite inkara lo inremsiam tawh project-te chhunzawm leh theih nan a ni a; chuvangin, military council chuan Australia mi Sean Turnell chu a haw hle a. Hremna pek ngei piah lamah tun anga ngaihtuahna hmang thei tawh lo tura siam a tum niin thenkhatin an sawi bawk a ni.
