Sagaing region, AYarTaw township, MaLeTa, NguangPin leh KanYin khua chu July 11, khan Military council sipaiten an luhchilh a, In 100 vel an hal chhiat bak tualchhung mi 3 an boral thu tualchhung mi te hnen atanga hriat a ni a.
Military council sipai 100 rualten MaLeTa khuaah In 30, NgaungPin khuaah In 15 leh KanYin khuaah In 40 vel an hal chhiat thu an sawi a.
Hetia Military council sipaiten an hal hnu hian NgaungPin khuaa an inkahnaah CDF sipai 1, NgaungPin khua kangmei avanga ruang pakhat leh KanYin khuaa kangmei vanga mipa ruang an hmuh thu RFA Media-ten an sawi a.
Thi leh hliam zat hi CDF-ten chiang takin an la hre thei rih lova, Military council sipaiten an hal hlum hmeichhe ruang pakhat chu khaw hnaih teah a la awm reng avangin khawchhung an la luh ngam loh thu RFA chuan a sawi a.
Military council sipaiten hetia an luhchilh avangin tualchhung mipui 1000 chuang, in leh an tlansan nual thu hriat a ni a.
Tuna khua te hi kumin 2023 February 23 khan Military council sipaiten Thlawhna an bomb avangin chenna in, Clinic leh school te an chhiat nual thu tualchhung miten an sawi a.
He buaina chungchangah hian Sagaing region, Military council thupuangtu Inmigration Minister U Saw Naing, Phone hmanga an zawhnaah chhanna a la awm rih lo a ni.
Data For Myanmar-ten kumin 2023 June-a an thuchhuah dan chuan Military council-ten thuneihna an lak, kum 2 chhung hian Sagaing region-ah chenna in 53816, Military council sipaiten an hal chhiat tawh thu an tar lang a ni.
