Sagaing region, Budalin township, Sone Kone khuaah March 25 zing dar 8:00 vel atang khan Military council sipai 50 rual ten an luhchilh thu hriat a ni a.
Hetia Military council sipai ten an luhchilh hnu hian mi nunna an laksak bakah In 175 an halchhia a, tlan chhuak ve thei lo kum upa hmeichhe 6 leh mipa 1 an hal hlum thu tualchhung mi ten an sawi a ni.
Heng an hal hlum tak kum upa te hi kum 58-80 chuang te an ni hlawm a. Tun hma khan Military council sipai ten Sone Kone khua an luhchilh tawh a, In an hal ngai lova, tun tumah erawh chuan tlanchhe ve thei lo kum upa, ina an tawm thu Sone Kone khuaa tualchhung mi pakhat chuan a sawi.
“An tlansan tak te hi kum upa lam veivak thei tawh lo an ni a, hruai chhuak dawn pawha thil harsa an ni tawh. Hetiang hian thil a awm dawn tih pawh kan hre lawk lova, kan thliar chhuak thei lo” tiin a sawi a ni.
Sone Kone khuaah hian in 300 chuang a awm a, in 157 an halchhiat thu a sawi zui bawk a, In an halna chungchangah Sone Kone khuaa mi pakhat chuan FRA Media hnenah heti hian a sawi.
“Kum upa te chenna in nen an hal hnan a, harsatna kan tawk nasa khawp mai. Ei leh in, silh leh fen, tanpui an mamawh zual khawp mai” tiin a sawi a ni.
March 24 pawh khan PDF ten bomb kam hmangin Military council sipai thi leh hliam an awm nual tawh a. March 25 khan Sone Kone khua Military council sipai ten an luhchilh thut thu Budalin township-a information pawl zinga mi pakhat chuan a sawi a ni.
Tun dinhmunah hian Military council sipai 200 rual ten pawl 2-ah inthenin Budalin township chhuah lam leh chhim lamah tinzawnin khawchhung then fai hna an beih mek thu tualchhung mi ten an sawi a ni.
Data for Myanmar ten an chhut danin Myanmar Military council ten thuneihna an lak hnu kumin February thla thleng khan rampum huapah chenna in 60459 an hal chhe tawh a, heng zinga In 47770 hi Sagaing region-a mi te an ni tiin an tarlang.
Hetiang vekin political prison pawl AAPP ten March 24-a an thuchhuah chuan Myanmar Military council ten thunneihna an lak hnu hian Military council sipai ten tualchhung mipui 3160 an thah tawh thu an tarlang a ni.
