Nikum October thla atanga theh luh tawh Burma Act chu US lower house-a Republican leh Democratic senate-ten thla tam tak chhung an sawiho hnuah nemngheh a ni ta a. Mahse chu Burma Act 2021 chu Senate lamin an la nemnghet leh dawn a ni.
Burma Act 2021-ah chuan Myanmar ram chhunga Democracy movement thlawp, humanitarian assistance (tanpuina) kum 5 chhung atan dollar maktaduai 450 remtihsak, Myanmar sipaite sumdawnna hrek leh an thil tihsual chunga mawhphurhna la tura hmalak tih thil pawimawh tak pali a tel a.
Chutih rualin, Myanmar ram chhunga tuialhthei leh gas hna thawhna hrek bet a, US hamthatna leh Myanmar mipuite ham thatna hmuh tur a khawih pawi theih dan report kim chang pek a nih tur thu pawh chu Act-ah chuan a tel bawk a.
Tichuan, Burma Act chu US Senate lamin an nemngheh chiah a ngai tawh a. A bik mawhphurna latu tur chu Indiana State-a upper house senator Todd Young a ni.
Republican senator Todd Young chuan a state chhung, Indiana-a awm Myanmar mi 34000 te nen inpawh hle mah se, Burma Acts thlawp chu a duh tlat lo a. A chhan pakhat chu Democratic lamin a ngaihdan la hmasa lova, an duh dan ringawta an kal vang niin chhuanlam a siam a. Ani berin green signal a hmuh hma chu mi dang Republican senator hovin engmah an tih ngham a rinawm loh a. US senate-ah party chhunga pawl hrang hrang kaihhruainaah Todd Young chu Myanmar lam kaihhnawiha hruaitu a ni.
Chuvangin, Indiana state-a Myanmar mipuite leh National Unity Government (NUG) sorkar chuan Todd Young-a thlawpna hmu turin lobby an tih a ngai dawn ta bawk a ni.
