Thuneihna atchilh Min Aung Hlai leh a chhungte chu hausa leh nuamsa takin awm mah se, a hnuaia sipaite erawh khawlai ui ang thaw thanga riltamin an pu ber an veng a ni tiin, sipai atanga CDM zawm ta Min Min Htaih chuan a sawi a, PDF te nen Naypyidaw kan bei ang tiih a sawi bawk.Magwei region battalion 19-a Deputy Sergeant (private no. T-479316) chu CDM Beikthano mipui venghimtu pawl nen an thawkho a. Ani chuan sipaite chu mipuite lama tang tur leh thuneihna atchilh Min Aung Hlaia do let turin a nawr a. Tunah amah kawmna interview hi i lo ngaithla ang u.
Z: I hming min hrilh thei em?
Ch: Min Min Htaih
Z: I private no.?
Ch: Ka private number chu T-479316 a ni e.
Z: Khawi battalion atanga chhuak nge i nih?
Ch: Sua battalion 19 atangin.
Z: Chu battalion commader chu tu nge?
Ch: Thut Aung Hlai.
Z: Sipaiah kum engzat nge i tan tawh?
Ch: Kum 10 a ni a. Kum 10 chu awm maim ai chuan a rei lo a, mahse tawrhna nena hun hman chuan dam chhung vawi 10 ang hial a ni.
Z: Sipaiah eng nihna nge I chelh?
Ch: Deputy Sergeant nihna ka chelh a. Ma-U-pin lamah ka awm thin a. Tunah chuan Naypyidaw thlengin, Naypyidaw-ah ka duhty thin a ni.
Z: Engvang nge sipai atanga CDM i rawn zawmna chhan?
Ch: Naypyidaw-a awm chu a rem thei lo a ni. Anni ho thuneihna an atchilh vang pawh a ni lo. Keini leh mipuite harsatna kan tawk a, ka rilru nain ramhnuai lamah ka rawn tlan lut ve a. Naypyidaw-a ka awm lai chuan ka nun chu khaw lai ui, kawng sira mu ang vel ka ni. A ni tak tak a, kawngsirah kan mu a, ruah a sur pawhin khumah kan mu thei lo. Naypyidaw khawpui luhnaah kan awm a, tui halin vawi engemaw zat ka awm tawh a, riltam leh chaw ei tur nei lo pawhin kan awm tawh bawk a. Chungte chuan ka rilru an tina lutuk he lamah kan rawn tlan ta a ni. Ral hmatawnga kan kalte an thih chuan an nupuite chu sipai hmun atanga hnawh chhuah an ni thin a, tanpuina leh kan pawisa khawl ve atangin cheng khat mah pek an ni ngai lo, pension pawh pek nghal an nih loh avangin, a hnuah chung hmeichhiate chu an buai hle thin bawk a.
Kan hlawh thenkhat chu sipai lam (corporation) lamah kan khawl ve thin a, mahse mahni pawisa khawl pawh engzat nge awm tih kan hre thei lo. A pung zat tur pawh hriat theihna kan nei lo. Kei pawh kum 10 chhunga ka lo dah luh ve tawh chu a tam viau tawhin ka ring. Mahse, tun thlengin engzat chiah nge tih pawh ka hre thei lo, lak chhuah theihna tur cheque pawh min pe lo.
Chuvangin, tunah chuan sipaite chu mipui venghim tur ni lovin, Sr. Gen. Min Aung Hlaia vengtu tur an ni tawh zawk a. Mipuiten harsatna an tawk a. Sipai lam lahin thuneihna latute an veng tlat a. Sipai hmunah mahni sipai pui, chhungkhuate tih a awm lo a, thuneituten thuneihna an atchilh a, an chhungte nen nuamsa takin, sum tam tak, lirthei tam tak neiin, vengtu tam tak an nei bawk a. Keini nun ve erawh chu leiah kan mu a, leiah kan ei a, anni chu kan la veng reng zawk bawk a ni.
Office an kal dawn pawhin kawngpui kam, thing buk phenah biruin kan lo nghak a, anni chu car-in an duhna hmunah inti vei takin an kal a. Chungtiang vel ka ngaihtuahin kan rilru hi a na tlat a. February ni 1 atangin thuneihna an la a, thuneihna an lak hnu atangin an nun pangngaiah an let leh thei tawh lo a, let thei pawh an ni tawh lo. Keini pawh mahni chhungte nena inhmuh chu sawi loh, phone hmanga inbiak dawn pawhin a ruka biak a ngai a. Kan phone te an hmuh vaih chuan min laksak nghal a. Ka ID pawh min laksak a, tun thleng National ID nei lovin ka awm a, a number chiah ka chhinchhiah a, thil dang tih a harsat phahin, nun kawng zawh chhoh pawh a tiharsa leh zual a ni. Ka hlawh lak zat chu tuna ka nihna deputy sergeant rank chuan thla khatah nuai 1 leh sing 6 chiah chiah a ni.
Mahse, ka hlawh atangin owner (sipai) lamin an cut a, bank-a khawl tur tiin bank lamin an cut leh bawk a. Tichuan bank ka pawisa khawl lak chhuah ka tum chuan, a theih tawh lo, bank ber a awm tawh lo a. Owner (sipai corporation) leh Bank chu an chhunfin a, engtin mah ka pawisa khawl zat chu kan hre thei ta lo a ni. Chu chu keimah chauh pawh a ni lo, sipai hovin an tuar deuh vek a, an rilru a beidawng hle a, he lama rawn kal chak pawh an tam mai. An la rawn kal theih loh avangin, a awm mai mai rih a ni. Hlauhnaa awp bet an nih angin hlau em emin an awm a, mahse hetiang reng a nih chuan nakinah sipai tumah an awm tawh lo vang.
Z: He lam i rawn zawmna chhan?
Ch: Thuneihna latu, thuneihna atchilh dolet thei turin
Beikthano ama PDF pawl nen thawhho kan duh vang a ni.
Z: CDM i zawm hnua tuna in dinhmun?
Ch: Tuna ka awmna Beikthano PDF pawl nen kan thawk ho a, min tanpui nasa a, ka mamawh sum leh pai bakah thil dang, kawng hrang hrangah min tanpui a ni.
Z: Sipai hmuna awm sipaite tan enge i sawi duh?
Ch: Ka hnung zuite ka ruala kal duhte pawh an awm a. Chung ho chu “Ka thiante u, lo kal rawh u. Tuna ka awmna hian,” tiin ka ko duh a ni. Koh theih an nih loh chuan kan inep dawn a, ka bei zui zel mai dawn a. Beih ngei a ngaih dawn avangin, ka thiante, ka pute chu min rawn zawm ve turin ka sawi duh a ni.
Z: Thil dang sawi belh duh i nei em?
Ch: Ka thian zawng te, Naypyidaw khawi hmunah nge in awm tih ka hre vek a. Engtin nge ka rawn beih dawn che u tih pawh ka hria. Chuvangin, thih in duh loh chuan kan lawm rawn tang rawh u. Battalion commander pawh ka pawi sa lo, kan chunga min sawisakna pawh a tam tawh a, mahni hnuaia sipaite chungah thatna lantir lova, thuneitute lamah an tang tlat a. Min rawn zawm lo a nih chuan ka bei dawn che u a ni.
He lamah chuan kawng engkimah khawsak a nuam vek a. Chuvangin, nangni pawh rawn kal ula ka ti a ni. Peoples’ Embrace hian mipuite tan hna a thawk a, nangni thuneihna atchilhtute angin a thawk ve lo. Thuneihna atchilh chu thuneitu sang zawkte tan chauh thil tha a ni a, nangni ang tan thatna a awm lo, buaina in la tawk dawn. Tunah min rawn zawm a nih chuan in tan kan tan a tha vek dawn. Hetah chuan tu pawh ang khat vekin kan inen asin.
Nakin lawkah keimahni hi nangni do turin ka rawn kal dawn. Chuvangin ka hriattir lawk che u a ni, min rawn zawm dawn lo a nih chuan kan inbei ang, keimah ngeiin ka rawn ho dawn. Battalion commander kha khawiah nge, Min Aung Hlai pawh khawiah nge a awm tih ka hre vek. Luh chhuahna zawng zawng tur pawh ka hre vek a, kan rawn bei tep tawh a nia. A rei lovang, ka rawn kir dawn.
Mipui harsatna siam a, ram chhung inkalpawhna, ei leh bar, sumdawnna zawng zawng tlak chhiahna chhan chu nangni thuneihna atchilhte avang a ni. Chuvangin, sipai thuneihna nuai bo hi kan mawhphurhna a ni a. Ka thiante u, in chhungte nen nuam taka awm za leh turin min rawn zawm rawh u. He sipai thuneihna a zung chawpa phawi chhuahna Revolution hi a hlawhtling ang, Revolution a hlawhtling ang, Revolution a hlawh tling ang.
