Mizoram State, Champhai District chhunga Myanmar raltlan mi 8000-te hnenah Mizoram sorkarin Refugee ID Card a pek chhuah thu hriat a ni.
Mizoram sorkar chuan Mizoram, Champhai District huam chhunga Myanmar raltlan mi 8747 zinga mi 8588 te hnenah Refugee ID Card an pek chhuah thu The Aizawl Post chuan a tar lang.
Champhai District huam chhungah hian Relief Camp hmun 33 a awm a. Chung zinga Relief Camp-a raltlan mi 2434 an awm a, Camp-a awm lo mi dang raltlan mi 6313 an awm thu hriat a ni.
April 13 atang khan Deputy Commissioner huaihawtnain Aizawl khawpuia raltlante tan Refugee ID Card an pek chhuah thu raltlan buaipuitute zinga mi pakhat chuan a sawi.
Aizawl DC chuan Aizawl khawpui chhunga Sihphir, Luangmual, Tuirial, Sihhmui leh Sairang khuaa raltlante tan Refugee ID Card an sem chhuak a.Camp-a awmte duhsak bik an ni a, hmun danga awm raltlante pawh bawh zui thuai a nih dawn thu a sawi.
Kum 2021 February 1, atanga Myanmar, Military Council ten thuneihna a pawng lak hnu atang khan Mizorama Myanmar raltlan mi 30000 (Singthum) chuang an tling tawh.
