July 17 tuk, All India Radio News Aizawlina a tar lan danin July 15 zan khan Mizoram, Champhai district Police-te chuan Chalbawia Junction Police check gate-ah heroin kg 1 leh gram 373 an man thu hriat a ni a.
Heroin an mante hi Zokhawthar leh Champhai inkara maxicab-a chuang mi 3-te hnen aţanga man an ni a. Kum 30 mi, Vanneihkimi Kanan, Khampat, Myanmar, tuna Zokhawthar a khawsa mek kut aţangin heroin kg 1 leh gram 329 man a ni a. Amah hi Myanmar aţanga rawn raltlan nia hriat a ni a.
He lirtheia chuang ve tho kum 19 mi, John Vanlalruata, Chanmari Aizawl leh kum 20 mi, Biakthanpuia, Chanmari West Aizawla cheng nia inchhal te hnen aţangin gram 22 ve ve mansak a ni bawk. Heroin tawlh rua puh an man mi 3-te hi Champhai Police Station-ah Narcotic Drugs and Psychotropic Substances Act, 1985 hmangin thubuai siamsak an ni a. July 16 khan Champhai district court-ah hruai an ni a, court phalna angin Police-in an la kawl zui a. He thila inhnamhnawih dangte pawh chhui zui zel an nih thu hriat a ni bawk.
Hetiang vek hian, July 14 pawh khan Excise and Narcotics department thawkte leh Assam Rifles te chuan Saitual district-a Saichal khaw bulah lirthei pahnih aţangin heroin kg 5 leh gram 114 an lo man tawh a. Hemi kaihhnawihah hian mi 7 man an ni a, an zinga 4-te chu hnam dang, Tripura-a mi te an nih thu hriat a ni bawk.
